نہروں کا معاملہ فیڈریشن اور پاکستان سے بڑا نہیں ہے، رانا ثنااللہ

فیصل آباد:وزیراعظم کے مشیر برائے سیاسی امور رانا ثنااللہ نےکہا ہےکہ نہروں پر اتفاق رائے ہوگا تو بات آگے بڑھےگی، نہروں کا مسئلہ فیڈریشن سے بڑا نہیں ہے۔
وزیر اعظم کے مشیر برائے سیاسی امور رانا ثنا اللہ نے میڈیا سے گفتگو کرتے ہوئے کہا کہ لاہور سے بہاولنگر موٹروے بھی بنے گی اور ملتان سے سکھر موٹروے بھی ن لیگ کے دور میں بنی ہے، سکھر سے کراچی تک موٹروے ضرور مکمل ہو گی۔
میڈیا سےگفتگو میں انہوں نے کہا کہ نہروں اور کالا باغ ڈیم کے حوالے سے ن لیگ کا ایک مؤقف ہے۔ اور اگر اس وقت ہماری بات مانی جاتی تو خشک سالی کی صورتحال نہ ہوتی۔ نہروں کا معاملہ فیڈریشن اور پاکستان سے بڑا نہیں ہے۔
اپنے ایک بیان میں رانا ثنااللہ کا کہنا تھا کہ چیئرمین پیپلز پارٹی بلاول بھٹو زرداری سے ملاقات میں وزیراعظم نے معاملہ اتفاق رائے سے حل کروانےکا یقین دلایا ہے۔
انہوں نےمزید کہا کہ قطعی طور پر ایسا کوئی منصوبہ نہیں بنائیں گے جس سے سندھ کا نقصان ہو۔ اور سندھ میں کچھ عناصر ذاتی اور سیاسی فائدے کے لیے پراپیگنڈا کر رہے ہیں۔ اس پراپیگنڈے کا سامنا کرنا اور اس کا توڑ کرنا پیپلزپارٹی کی مجبوری ہے۔
رانا ثنا اللہ نے کہا کہ ذاتی طور پر سمجھتا ہوں کہ پیپلزپارٹی نے نہروں پر وہ موقف اپنایا جس پر ان عناصر کو موقع نہ ملے۔