چڑیا گھر کے ٹکٹ کی قیمتوں میں اضافے سے متعلق مریم اورنگزیب نے وضاحت دیدی

لاہور:پنجاب کی سینئر وزیر مریم اورنگزیب نے چڑیا گھر کی ٹکٹوں کی قیمت میں اضافے کے حوالے سے وضاحت دیتے ہوئے کہا ہے کہ چڑیا گھر کے ٹکٹ کی قیمت میں کوئی اضافہ نہیں کیا گیا۔
میڈیا سے گفتگو کرتے ہوئے مریم اورنگزیب نے کہا کہ چڑیا گھر میں بڑوں کیلئے انٹری ٹکٹ 100 روپے ہی ہے اور 100 روپےمیں 98 فیصد چڑیا گھر دیکھا جا سکتا ہے۔
مریم اورنگزیب نے کہا کہ رینگنے والے جانوروں کو دیکھنے کا ٹکٹ 200 روپے جبکہ ہولوگرام کا ٹکٹ 300 روپے کاہے، اس طرح چڑیا گھر دیکھنے کا مکمل پیکیج 500 روپے ہے۔
سینئر صوبائی وزیر نے کہا کہ چڑیا گھر میں نئی سہولیات کی قیمت الگ مقرر کی گئی ہے، داخلہ ٹکٹ کے لیے الگ کاؤنٹرز موجود ہیں، ایکوریم اور ہولوگرام کے ٹکٹوں کے لیے الگ ونڈوز بنا دی ہیں، سسٹم ٹھیک کر دیا ہے، اب غلط فہمی نہیں ہو گی، اس کے علاوہ ٹکٹ کاؤنٹر کے باہر شکایت سیل بھی قائم ہے۔
سنئیر صوبائی وزیر نے مزید کہا کہ بعض افراد نے ایکوریم کے ساتھ ملا کر 300 روپے کے ٹکٹ خریدے تھے اور بعض نے ایکوریم اور ہولوگرام کو ملا کر 500 والے ٹکٹ خریدے، اس وجہ سے غلط فہمی پیدا ہوئی کہ چڑیا گھر کے ٹکٹ کی قیمت میں اضافہ ہو گیا ہے۔