پنجاب پولیس کی خاتون افسر ایکسی لینس اِن پرفارمنس ایوارڈ 2025ء کیلئے منتخب

لاہور:انٹرنیشنل ایسوسی ایشن آف ویمن پولیس نے پنجاب کی سپرنٹنڈنٹ آف پولیس (ایس پی) عائشہ بٹ کو ’ایکسیلنس اِن پرفارمنس ایوارڈ 2025 کے لیے منتخب کر لیا۔
پنجاب پولیس کی جانب سے سماجی رابطے کی ویب سائٹ ایکس پر جاری بیان کے مطابق اسکاٹ لینڈ کے شہر گلاسگو میں رواں برس ستمبر میں منعقد ہونے والی 62ویں سالانہ کانفرنس میں ایس پی عائشہ بٹ کو عالمی ایوارڈ سے نوازا جائے گا۔
عائشہ بٹ کو پولیسنگ کے شعبے میں شاندار کارکردگی اور خدمات کے اعتراف میں منتخب کیا گیا ہے،ایس پی عائشہ بٹ اس وقت گوجرانوالہ میں بطور سٹی ٹریفک آفیسر تعینات ہیں۔
خیال رہے کہ یہ ایوارڈ ہر سال دنیا بھر سے ایک خاتون پولیس افسر کو اپنے معاشرے کے لیے غیر معمولی خدمات کے اعتراف میں دیا جاتا ہے۔
دوسری جانب آئی جی پنجاب ڈاکٹر عثمان انور نے ایس پی عائشہ بٹ کو محکمہ پولیس کا نام روشن کرنے پر مبارکباد دی ہے۔
ڈاکٹر عثمان انور کا کہنا تھا کہ ایس پی عائشہ بٹ کی کامیابی تمام پولیس افسران بالخصوص خواتین افسران کے لیے باعث فخر ہے۔