شادی والے گھر میں ماتم، 23 سالہ دلہن بارات والے دن قتل

لاہور: لاہور میں شادی والے گھر ماتم بچھ گیا، نامعلوم افراد کی فائرنگ سے 23 سالہ دلہن عائشہ بارات والے دن جاںبحق ہو گئی۔
تفصیلات کے مطابق یہ واقعہ لاہور کے علاقے سندر، موہلنوال عزیز کالونی میں پیش آیا جہاں نامعلوم افراد کی فائرنگ سے 23 سالہ لڑکی جاں بحق ہو گئی۔
 پولیس کے مطابق، مقتولہ کی شناخت عائشہ دختر حبیب کے نام سے ہوئی، جس کی آج شادی تھی اور بارات گھر آنے والی تھی۔
پولیس حکام کا کہنا ہے کہ نامعلوم ملزمان نے عائشہ کو سر میں گولی مار کر قتل کیا اور موقع سے فرار ہو گئے۔
واقعے کے بعد پولیس اور فرانزک ٹیم موقع پر پہنچ گئی اور شواہد اکٹھے کر کے مختلف پہلوؤں پر تحقیقات کا آغاز کر دیا۔
تحقیقات مکمل ہونے کے بعد مقتولہ کی لاش ایدھی ایمبولینس کے ذریعے مردہ خانے منتقل کر دی گئی۔
پولیس کی جانب سے مزید بتایا گیاکہ ملزمان کی گرفتاری کے لیے چھاپے مارے جا رہے ہیں اور جلد حقائق سامنے لائے جائیں گے۔