’’اردو سے دوستی کریں، یہ نئی زبان نہیں، یہیں پیدا ہوئی، پلی بڑھی اور پروان چڑھی ہے‘‘ بھارتی سپریم کورٹ

نئی دہلی:بھارتی سپریم کورٹ نے تاریخی فیصلہ دیتے ہوئے ہندوستان میں اردو زبان کا استعمال کرنا درست قرار دے دیا ہے۔
بھارتی میڈیا کے مطابق سپریم کورٹ نے ریاست مہاراشٹرا میں میونسپل کونسل کے سائن بورڈز پر اردو زبان کے استعمال کے خلاف دائر درخواست کو مسترد کر دیا ہے۔
دوران سماعت سپریم کورٹ نے ممبئی ہائی کورٹ کے فیصلے کو برقرار رکھتے ہوئے کہا کہ اردو کو سائن بورڈ پر استعمال کرنا قانونی اور درست ہے۔
درخواست گزار نے موقف اختیار کیا تھا کہ سرکاری بورڈز پر صرف مراٹھی زبان لکھی جانی چاہیے، تاہم عدالت نے ریمارکس دیتے ہوئے کہا کہ اگرکسی علاقے میں اردو بولنے والے شہری موجود ہیں تو مراٹھی کے ساتھ اردو کا استعمال کوئی مسئلہ نہیں۔
دوران سماعت سپریم کورٹ کے دو رکنی بینچ نے کہا کہ اردو رابطے کی ایک موثر زبان ہے اور یہ بھارت کی اپنی زبان ہے۔
 بینچ نے ریمارکس دیتے ہوئے کہا کہ’’اردو سے دوستی کریں، یہ نئی زبان نہیں، یہیں پیدا ہوئی، پلی بڑھی اور پروان چڑھی ہے‘‘
خیال رہے کہ ایک خاتون نے میونسپل کونسل کے بورڈ پر مراٹھی کے ساتھ اردو کے استعمال کو چیلنج کیا تھا، جس پر ممبئی ہائیکورٹ نے اس درخواست کو مسترد کر دیا گیا تھا جس کو بعدا زاں بھارت کی اعلی عدالت میں چیلنج کیا تھا۔تاہم اب سپریم کورٹ نے بھی یہی فیصلہ برقرار رکھا ہے۔