ملک کے مختلف علاقوں میں سورج کی تپش میں دن بہ دن اضافہ

ملک کے مختلف علاقوں میں سورج کی تپش دن بہ دن بڑھتی جا رہی ہے اور محکمہ موسمیات کی جانب سے جاری کردہ اعداد و شمار بھی گرمی کے احساس میں اضافہ کرنے لگا۔

گزشتہ روز جیکب آباد کا درجہ حرارت 43 ڈگری سینٹی گریڈ تک پہنچ گیا، جہاں زمین تپ رہی ہے اور لوگ سائے کی تلاش میں مارے مارے پھر رہے ہیں۔ مٹھی اور شہید بے نظیر آباد میں بھی صورتحال کچھ کم نہیں، جہاں 42 ڈگری کی گرمی نے لوگوں کو گھروں میں محصور ہونے پر مجبور کر دیا ہے۔

کراچی اور دادو میں پارہ 41 ڈگری کو چھو گیا، جہاں شہریوں نے گرمی سے بچنے کے لیے سمندری ہواؤں کا سہارا لیا، لیکن ہیٹ ویو کا اثر ہنوز برقرار ہے۔

پنجاب بھی شدید گرمی کی لپیٹ میں ہے۔ ساہیوال میں درجہ حرارت 40 ڈگری تک پہنچ چکا ہے جبکہ ڈی جی خان، بہاولپور اور ملتان میں 39 ڈگری کی گرمی ریکارڈ کی گئی ہے۔

ملک کے دیگر شہروں کی طرح وفاقی دارالحکومت اسلام آباد میں بھی گرمی کا راج ہے۔ حالیہ بارش اور ژالہ باری کے باوجود موسم ایک بار پھر سخت گرم ہو چکا ہے۔ محکمہ موسمیات نے آنے والے دنوں میں ہیٹ ویو کی پیش گوئی کرتے ہوئے خبردار کیا ہے کہ درجہ حرارت میں مزید اضافہ متوقع ہے۔

محکمہ موسمیات کا کہنا ہے کہ ملک کے بیشتر علاقوں میں آئندہ دنوں کے دوران ہیٹ ویو کی کیفیت پیدا ہو سکتی ہے، جس کے پیش نظر شہریوں کو خاص احتیاط برتنے کی ضرورت ہے۔

این ڈی ایم اے نے بھی خبردار کیا ہے کہ گرمی کی موجودہ لہر 27 اپریل تک جاری رہے گی۔ طبی ماہرین نے عوام سے اپیل کی ہے کہ بلا ضرورت دھوپ میں نکلنے سے گریز کریں، پانی کا زیادہ استعمال کریں، اور ہیٹ ویو سے بچاؤ کی تمام احتیاطی تدابیر پر عمل کریں۔

گرمی کا یہ سلسلہ کب تھمے گا؟ یہ سوال ہر زبان پر ہے، لیکن فی الحال موسم کی شدت میں کسی کمی کے آثار نظر نہیں آ رہے۔