خاتون ایس ایچ او ڈکیتی میں استعمال ہونے والا پستول گھر میں رکھنے پرگرفتار

لٹن روڈ ویمن پولیس اسٹیشن کی ایس ایچ او کو مبینہ طور پر غیر قانونی طور پر 9 ایم ایم پستول رکھنے کے الزام میں گرفتار کیا گیا ہے جو ڈکیتی میں گرفتار ملزم کے پاس سے برآمد کیا گیا تھا۔

ڈی آئی جی آپریشنز فیصل کامران کے حکم پر پولیس فورس میں اختیارات کے ناجائز استعمال، کرپشن اور بدانتظامی کے خلاف زیرو ٹالرنس پالیسی کے تحت کارروائی کا آغاز کیا گیا ہے۔

لاہور پولیس کے ترجمان کا کہنا ہے کہ ڈکیتی میں استعمال ہونے والا پستول ایس ایچ او سب انسپکٹر ثانیہ کی رہائش گاہ سے برآمد ہوا ہے۔

تفصیلات بتاتے ہوئے انہوں نے کہا کہ کاہنہ کے علاقے میں ڈکیتی کی واردات میں ملوث ملزم نے پولیس کے سامنے انکشاف کیا کہ اس نے اسٹریٹ کرائم میں نائن ایم ایم پستول استعمال کیا تھا، انہوں نے مزید کہا کہ اسلحہ خاتون ایس ایچ او کی غیر قانونی تحویل میں تھا۔

اس اطلاع پر کارروائی کرتے ہوئے پولیس ٹیم نے ایس ایچ او کے گھر پر چھاپہ مارا اور پستول برآمد کرلیا۔

انکوائری رپورٹ سامنے آنے کے بعد ڈی آئی جی نے ایس آئی ثانیہ کے خلاف مقدمہ درج کرنے اور ان کی گرفتاری کا حکم دیا۔

ڈی آئی جی نے کہا کہ محکمے کی بدنامی کرنے والے پولیس افسران اور اہلکاروں کا کڑا احتساب یقینی بنایا جا رہا ہے۔

انہوں نے کہا کہ احتساب کے عمل سے کسی کو نہیں بخشا جائے گا، پنجاب پولیس میں انعام اور سزا کی پالیسی کے تحت کارروائیاں بلا امتیاز جاری رہیں گی۔