موٹروے پر اووراسپیڈنگ کرنے پر معروف یوٹیوبر ڈکی بھائی کے خلاف مقدمہ درج

لاہور:سعدالرحمان عرف ڈکی بھائی کے نام سے مشہور یوٹیوبر کو موٹر وے پر اسٹنٹ دکھانا مہنگا پڑ گیا، جس پر موٹروے پولیس نے کارروائی کرتے ہوئے ڈکی بھائی کے خلاف مقدمہ درج کر لیا۔
واضح رہے کہ حال ہی میں مشہور یوٹیوبر سعد الرحمان عرف ڈکی بھائی کو ہائی وے پر گاڑی چلاتے ہوئے خطرناک اسٹنٹ کرتے دیکھا گیا تھا۔
سوشل میڈیا پر شیئر کی گئی ویڈیو میں دیکھا جا سکتا ہے کہ وہ ہائی وے پر گاڑی چلاتے ہوئے آٹو موڈ میں اپنی کار کے ساتھ سو رہا تھا اور اپنی ٹانگیں سٹیئرنگ وہیل پر رکھے ہوئے تھا۔
ڈکی کی ویڈیو سوشل میڈیا پر وائرل ہوئی تو صارفین کی بڑی تعداد نے اسے شدید تنقید کا نشانہ بنایا اور یوٹیوب کے اس اقدام کو غیر ذمہ دارانہ قرار دیتے ہوئے ان کی گرفتاری کا مطالبہ کیا۔
صارفین نے اس کے خلاف نیشنل ہائی ویز اینڈ موٹرویز پولیس میں باضابطہ شکایات درج کرائی تھیں۔
صارفین کی شکایات پر ایکشن لیتے ہوئے نیشنل ہائی ویز اینڈ موٹرویز پولیس نے یوٹیوبر سعد کے خلاف غفلت، لاپرواہی اور تیز رفتاری پر مقدمہ درج کر لیا ہے۔
اس حوالے سے نیشنل ہائی ویز اینڈ موٹرویز پولیس نے اس حوالے سے سوشل میڈیا پر ایک ویڈیو پیغام بھی جاری کیا ہے۔
موٹروے پولیس کے ترجمان کے مطابق ڈکی بھائی کی اسٹیئرنگ وہیل پر پاؤں رکھ کر گاڑی چلاتے ہوئے ویڈیو سامنے آئی تھی، جس پر کارروائی کرتے ہوئے ان کے خلاف مقدمہ درج کر لیا گیا ہے۔