پاک بھارت کشیدگی :پی ایس ایل براڈکاسٹ کمپنی میں شامل بھارتی عملہ پاکستان سے بےدخل

لاہور:پہلگام واقعے کے بعد پاک بھارت کشیدگی کے اثرات پاکستان سپر لیگ (پی ایس ایل) پر بھی نمودار ہونے لگے ہیں۔
 حکومت پاکستان کی ہدایت پر پاکستان سپر لیگ (پی ایس ایل) کی براڈکاسٹ کمپنی میں شامل 23 بھارتی عملے کے ارکان کو ملک بدر کر دیا گیا۔ بھارتی شہریوں کو لاہور پولیس کی نگرانی میں واہگہ بارڈر کے ذریعے واپس بھارت روانہ کر دیا گیا۔
ذرائع کے مطابق حکومت پاکستان نے بھارتی شہریوں کو فوری طور پر ملک چھوڑنے کی ہدایت کی تھی، جس پر عمل کرتے ہوئے متعلقہ اداروں نے کارروائی مکمل کی۔
حکام کا کہنا ہے کہ یہ اقدام بھارتی جارحیت اور معاندانہ رویے کے تناظر میں کیا گیا ہے تاکہ ملکی خودمختاری اور قومی وقار کا دفاع کیا جا سکے۔
اس حوالے سے  پاکستان کرکٹ بورڈ (پی سی بی) کے ترجمان عامر میرکا کہنا ہے کہ’حکومت پاکستان کا فیصلہ سب کے لیے مقدم ہے‘۔
عامر میر سے جب پوچھا گیا کہ آیا پی ایس ایل میں تعینات انڈین براڈکاسٹنگ عملہ پاکستان چھوڑ چکا ہے، تو ان کا کہنا تھا کہ ’حکومتِ پاکستان کا فیصلہ سب کے لیے مقدم ہے۔‘
خیال رہے کہ پی ایس ایل کی براڈ کاسٹنگ ٹیم میں تقریباً 12 بھارتی اہلکار شامل تھے جو مختلف تکنیکی اور پروڈکشن ذمہ داریاں انجام دے رہے تھے۔