190 ملین پاؤنڈز کیس،بانی پی ٹی آئی اور بشریٰ بی بی کی فیصلے کیخلاف اپیلیں سماعت کیلئے مقرر

اسلام آباد:190 ملین پاؤنڈز کیس میں بانی پی ٹی آئی اوراہلیہ بشریٰ بی بی کی فیصلے کیخلاف اپیلیں سماعت کیلئے مقرر کرلی گئیں۔ 
اسلام آباد ہائی کورٹ نے 190 ملین پاؤنڈ کیس کے فیصلے کیخلاف  بانی چیئرمین پی ٹی آئی اور ان کی اہلیہ بشریٰ  بی بی کی اپیلیں سماعت کیلئے مقرر کردیں۔
اسلام آباد ہائیکورٹ کےقائم مقام چیف جسٹس سرفراز ڈوگر اور جسٹس محمد آصف 30 اپریل کو بانی پی ٹی آئی اور بشریٰ بی  بی کی اپیلوں پر سماعت کریں گے۔
 خیال رہے کہ بانی پی ٹی آئی عمران خان اور بشریٰ بی بی نے سزا کے خلاف اپیلیں دائر کر رکھیں ہیں، 17 جنوری کے فیصلے کے خلاف 27 جنوری کو اپیلیں فائل ہوئی تھیں  اور 17 اپریل کو کیس جلد سماعت کے لیے مقرر کرنے کی درخواستیں عدالت نے منظور کرلی تھیں۔
واضح رہے کہ احتساب عدالت نے 17 جنوری کو فیصلہ سناتے ہوئے 190 ملین پاؤنڈز کیس میں بانی پی ٹی آئی کو 14 سال جبکہ  بشریٰ بی بی کو 7 سال قید و جرمانہ کی سزا ئیں سنائی تھیں۔