لاہور:وزیراعلیٰ مریم نواز آج یو ای ٹی میں لیپ ٹاپ اسکیم کا آغاز کریں گی

لاہور:وزیراعلیٰ پنجاب مریم نوازشریف آج یونیورسٹی آف انجینئرنگ اینڈ ٹیکنالوجی(یوای ٹی) لاہورمیں منعقدہ خصوصی تقریب کے دوران لیپ ٹاپ اسکیم کا باقاعدہ آغاز کریں گی۔
 تقریب میں مختلف جامعات کے طلبہ و طالبات شرکت کرینگے۔
انتظامیہ کے مطابق تقریب کے باعث پنجاب یونیورسٹی، یوای ٹی لاہور اور یونیورسٹی آف ہوم اکنامکس میں آج کلاسز منعقد نہیں ہوں گی۔
طلبہ کو اطلاع دی گئی ہے کہ 30 اپریل کی متبادل کلاسز 3 مئی بروز جمعہ کو آن لائن منعقد کی جائیں گی۔
یونیورسٹی انتظامیہ نے واضح کیا ہے کہ اساتذہ اوردیگرملازمین آج معمول کے مطابق اپنی ڈیوٹی انجام دیں گے، جبکہ تدریسی سرگرمیاں عارضی طور پرمعطل رہیں گی۔
تقریب کے دوران لیپ ٹاپ اسکیم کے اغراض ومقاصد، تقسیم کا طریقہ کاراورمستقبل کے تعلیمی منصوبوں پر بھی روشنی ڈالی جائے گی۔
دوسری جانب صوبائی وزیر تعلیم رانا سکندر حیات کے مطابق آج کی تقریب میں 21 ہزار طلباء کو لیپ ٹاپس دیے جائیں گے۔
وزیر تعلیم نے بتایا کہ لیپ ٹاپ تقسیم کے لیے تقاریب پنجاب کے تمام ڈویژنز میں منعقد کی جائیں گی اور مجموعی طور پر 1 لاکھ 10 ہزار لیپ ٹاپس پبلک سیکٹر کے طلباء میں تقسیم کیے جائیں گے۔
صوبائی وزیر تعلیم نے کہا کہ مسلم لیگ (ن) نے ایک بار پھر ثابت کر دیا ہے کہ وہ جو کہتی ہے کر کے دکھاتی ہے۔ 
ان کا مزید کہنا تھا کہ مسلم لیگ (ن) جھوٹے دلاسے نہیں دیتی بلکہ اپنے ہر وعدے کی تکمیل کرتی ہے اور موجودہ لیپ ٹاپ اسکیم اس کا منہ بولتا ثبوت ہے،طلباء اور والدین نے حکومت کے اس اقدام کو سراہا ہے اور امید ظاہر کی ہے کہ ایسے منصوبے نوجوانوں کو بااختیار بنانے میں اہم کردار ادا کریں گے۔