مقبوضہ کشمیر: بھارتی فوجی گاڑی گہری کھائی میں جا گری،3 فوجی ہلاک

سرینگر:بھارت کے زیر انتظام مقبوضہ جموں کشمیر کے ضلع رامبن میںبھارتی فوج کی گاڑی گہری کھائی میں جاگری جس کے نتیجے میں تین بھارتی فوجی ہلاک ہو گئے۔
انڈین میٖڈیا کے مطابق مرنے والوں کی شناخت امیت کمار، سوجیت کمار اور مان بہادر کے طور پر ہوئی ہے۔ 
میڈیا رپورٹس کے مطابق یہ واقعہ رات 11:30 بجے کے قریب قومی شاہراہ 44 پر بیٹری چشمہ کے قریب اس وقت پیش آیا جب فوج کا قافلہ جموں سے سری نگر جا رہا تھا۔
ذرائع کے مطابق حادثہ گاڑی کے ”ٹائی راڈ“ میں اچانک خرابی کے باعث پیش آیا۔ یہ حادثہ قدرتی پھسلن یا موسمی حالات کی وجہ سے نہیں بلکہ بھارتی فوج کی مکینیکل لاپرواہی کا نتیجہ تھا۔ حادثے کے بعد بھی بھارتی فوج کی جانب سے کوئی وضاحت سامنے نہیں آئی، جس سے جواب دہی کی شدید کمی ظاہر ہوتی ہے
جموں و کشمیر پولیس، اسٹیٹ ڈیزاسٹر رسپانس فورس (SDRF) اور مقامی رضاکاروں کے ساتھ مل کر بھارتی فوج کی طرف سے ریسکیو آپریشن تیزی سے شروع کیے گئے۔ لاشوں کو نکالنے اور علاقے کو محفوظ بنانے کی کوششیں جاری ہیں۔