پاک بھارت کشیدگی: پی ایس ایل کے بقیہ میچز کراچی منتقل کر دیئے گئے

راولپنڈی: پہلگام فالس فلیگ واقعہ اور بھارت کی جانب سے بزدلانہ حملوں کے بعد جاری پاک بھارت کشیدگی کےباعث پاکستان سپر لیگ (پی ایس ایل) کے بقیہ میچز کراچی منتقل کر دئیے گئے ہیں،جبکہ آج راولپنڈی میں ہونے والا میچ ملتوی کردیا گیا ہے۔
 تازہ ترین اطلاعات کے مطابق راولپنڈی کرکٹ اسٹیڈیم کے قریب ایک ڈرون گرنے کا واقعہ پیش آیا ہے، جس نے سیکیورٹی اداروں کو الرٹ کر دیا ہے۔ راولپنڈی میں پاک فوج نے تین ڈرونز مار گرائے ہیں۔
ذرائع کے مطابق، جنگی حالات اور ڈرون گرنے کے تسلسل کے باعث پی ایس ایل کے باقی ماندہ میچز ملتوی کیے جانے کے امکانات پیدا ہوگئے تھے۔
پی سی بی نے فیصلہ کیا ہے کہ آنے والے دنوں میں ضرورت محسوس ہونے پر بقیہ میچز دبئی منتقل کرنے کا آپشن بھی موجود ہے۔
ذرائع کے مطابق اس حوالے سے پی سی بی، فرنچائزز اور غیر ملکی پلئیرز کی میٹنگ طلب کی گئی، غیر ملکی پلئیرز کی رائے کی روشنی میں میچز کراچی میں کرانے کا فیصلہ کیا گیا۔
میچز کراچی میں کرانے کا حتمی فیصلہ وزارت داخلہ کی جانب سے کیا گیا۔
پی سی بی ذرائع کا کہنا ہے کہ پی ایس ایل ابھی تک ”آن“ ہے۔