پاک بھارت ڈی جی ایم اوز کا تیسری بار ہاٹ لائن پر رابطہ ،سیز فائر برقرار رکھنے پر اتفاق

اسلام آباد:حالیہ پاک بھارت کشیدگی کے بعد پاکستان اور بھارت کے ڈائریکٹرز جنرل آف ملٹری آپریشنز (ڈی جی ایم اوز) کے درمیان تیسری بار ہاٹ لائن کے ذریعے رابطہ ہوا ہے۔
تفصیلات کے مطابق پاکستان اور بھارت کے ڈی جی ایم اوز کے درمیان رابطوں کا سلسلہ جاری ہے، ذرائع نے بتایا کہ گزشتہ روز ڈی جی ایم اوز پاکستانی فوج کے میجر جنرل کاشف عبداللہ اور ہندوستانی فوج کے لیفٹیننٹ جنرل راجیو گھئی کے درمیان سیز فائر کے بعد تیسرا رابطہ ہوا۔
ذرائع کا کہنا تھا کہ ڈی جی ایم اوز کے رابطے کے دوران سیز فائر کو مستحکم کرنے پر بات چیت کی گئی اور تیسرے رابطے میں سیز فائر برقرار رکھنے کیلئےمزید مثبت اقدام پراتفاق کیا گیا۔
ذرائع نے بتایا کہ دونوں فریقوں نے ایل او سی کے ساتھ ساتھ امن کو برقرار رکھنے کی اہمیت پر زور دیا اور پیر کو ہونے والے سابقہ ​​رابطے کے دوران طے پانے والے مفاہمت کے عزم کا اعادہ کیا۔
ہاٹ لائن رابطے میں دونوں ڈی جی ایم اوز نے زمینی صورتحال پر تبادلہ خیال کیا، باخبر ذرائع نے بتایا کہ دونوں ممالک نے سیزفائر برقرار رکھنے اور پیر کو ہونے والے سابقہ رابطے میں طے شدہ ’سٹیٹس کو‘ کو برقرار رکھنے پر اتفاق کیا ہے۔
خیال رہے کہ دونوں ممالک کے درمیان جنگ بندی  امریکا اور دیگر دوست ممالک کی کوششوں سے ممکن ہوئی تھی، جبکہ جنگ بندی کا اعلان امریکی صدر ڈونلڈ ٹرمپ نے اپنے ایکس پیغام میں کیا تھا۔