امریکی کردار مسترد،پاکستان کیساتھ جنگ بندی دو طرفہ تھی ،وکرم مسری

نیودہلی: بھارتی سیکرٹری خارجہ وکرم مسری نےپاک بھارت جنگ کے دوران امریکی صدر ٹرمپ کے کردار کومستر د کرتے ہوئے کہاہے کہ پاکستان اور بھارت کے درمیان جنگ بندی قطعی طور پر دوطرفہ تھی، ٹرمپ کا اس میں کوئی کردارنہیں تھا۔
انہوںنے صدر ٹرمپ کو بھی جھٹلا دیا، امریکی صدر ٹرمپ دنیا کے مختلف مقامات پر جاکر 7 بار کہہ چکے جنگ بندی انہوں نے کرائی، بھارتی سیکرٹری خارجہ نے پارلیمانی کمیٹی کو بریفنگ میں کہا کہ صدرٹرمپ نے ہم سے بیچ میں آنے کی اجازت نہیں لی، وہ خود ہی سٹیج پر آناچاہتے تھے اور وہ آگئے۔
انہوں نے مزید کہا کہ پاکستان اوربھارت کے درمیان تنازع روایتی جنگ کے دائرے میں رہا اور پاکستان سے کسی بھی ایٹمی یا حملے کے اشارے نہیں ملے۔
بھارتی میڈیا کے مطابق پارلیمانی کمیٹی کی طرف سے بار بار پوچھا گیا کہ پاکستان سے جنگ میں کتنے بھارتی طیارے تباہ ہوئے لیکن وکرم مسری قومی سلامتی کا بہانہ بنا کر جواب دینےسے انکار کرتے رہے۔

خیال رہے کہ اس سے قبل امریکی صدر ڈونلڈ ٹرمپ نے پاک بھارت کشیدگی کے دوران سیز فائر معاہدے کا اعلان کیا تھا جس کا پاکستان کی جانب سے بھرپور خیر مقدم کیا گیا،جبکہ انتہا پسند مودی سرکار اور بھارت کی جانب سے اس کی بھر پور مخالفت کی گئی تھی۔