وفاقی حکومت نےیوم تکبیر پر ملک بھر میں عام تعطیل کا اعلان کر دیا

اسلام آباد: وفاقی حکومت نے 28 مئی کو یوم تکبیر کی مناسبت سے ملک بھر میں عام تعطیل کا اعلان کر دیا۔
 حکومتی ذرائع کے مطابق یومِ تکبیر کو قومی سطح پر منانے کے لیے تعطیل کا فیصلہ کیا گیا ہے تاکہ عوام اس اہم دن کی مناسبت سے تقریبات میں بھرپور انداز میں شریک ہو سکیں اور ملک کی دفاعی کامیابیوں کو خراجِ تحسین پیش کر سکیں۔
خیال رہےکہ گزشتہ روز سندھ حکومت نے بھی یوم تکبیر کے موقع پر 28 مئی کو عام تعطیل کا اعلان کیا تھا، اس سلسلہ میں صوبائی دفاتر، بلدیاتی کونسلز سمیت تمام سرکاری دفاتر بند رہیں گے۔
جبکہ اس سے قبل پاکستان سٹاک ایکسچینج کی جانب سے بھی یومِ تکبیر کے موقع پر 28 مئی کو عام تعطیل کا اعلان کیا گیا ہے۔
یاد رہے کہ وفاقی حکومت نے دسمبر 2024 میں 28 مئی کو عام تعطیلات کی فہرست میں شامل کیا تھا، گزشتہ سال نوٹیفکیشن کے ذریعے 28 مئی کو عام تعطیل کا اعلان کیا گیا تھا۔
واضح رہے کہ پاکستان نے بھارت کے ایٹمی دھماکوں کا جواب 28 مئی 1998 کو صوبہ بلوچستان کے علاقے چاغی میں دھماکوں کے ذریعے دیا تھا، ایٹمی دھماکوں کے بعد پاکستان نے مسلم دنیا کی پہلی جبکہ دنیا کی 7ویں ایٹمی طاقت بننے کا اعزاز حاصل کیاتھا اور اس دن کو پاکستانی قوم ’یوم تکبیر‘ کے نام سے یاد کرتے ہیں۔
 یہ دن قومی خودمختاری، استقامت اور سائنسی ترقی کی علامت سمجھا جاتا ہے، اور اس موقع پر ملک بھر میں سیمینارز، ریلیاں اور مختلف تقاریب منعقد کی جاتی ہیں۔