سندھ حکومت کا بڑا فیصلہ،خواتین کو ای وی اسکوٹیز فراہم کرنے کا اعلان

کراچی: سندھ حکومت کی جانب سے بڑا فیصلہ سامنے آیا ہے جس کے تحت خواتین کو ای وی اسکوٹیز کی فراہم کی جائے گی۔
تفصیلات کے مطابق سندھ حکومت کی جانب سے خواتین کو ای وی اسکوٹیز کی فراہمی کے لیےآئندہ ماہ قرعہ اندازی کے انعقاد کا فیصلہ کیا گیاہے، منصوبے کے پہلے مرحلے میں 1000 خواتین کو برقی اسکوٹیز دی جائیں گی، جس کے لیے تمام انتظامات مکمل کر لیے گئے ہیں۔ 
اس حوالے سے صوبائی وزیر ٹرانسپورٹ شرجیل میمن کی زیر صدارت اجلاس میں ای وی ٹیکسی، ای وی اسکوٹی سمیت بڑے ٹرانسپورٹ منصوبوں کی پیش رفت کا تفصیلی جائزہ لیا گیا۔
دوران اجلاس شرجیل انعام میمن نے کہا کہ ای وی ٹیکسی اور اسکوٹی نہ صرف نوجوانوں کے لیے روزگار کا ذریعہ ہیں بلکہ خواتین کی نقل و حرکت اور ماحولیاتی بہتری میں بھی اہم کردار ادا کریں گی۔
 حکومت جون 2025 میں خواتین کو ای وی اسکوٹیز کی فراہمی کے ساتھ ساتھ ای وی ٹیکسی منصوبے پر بھی کام شروع کرنے کی کوشش کر رہی ہے۔
پروجیکٹ ڈائریکٹر یلو لائن ضمیر عباسی نے اجلاس میں بتایا کہ یلو لائن بی آر ٹی منصوبے کا اہم حصہ جام صادق پل مقررہ وقت ستمبر 2025 سے قبل جون 2025 میں مکمل کر لیا جائے گا۔
سی ای او ٹرانس کراچی نے ریڈ لائن بی آر ٹی منصوبے سے متعلق بریفنگ دیتے ہوئے بتایا کہ ڈیپوز، اسٹیشنز اور بائیو گیس پلانٹ کی تعمیر پر بھرپور کام جاری ہے۔ شرجیل انعام میمن نے تمام متعلقہ اداروں کو ہدایت کی کہ منصوبوں کی بروقت اور معیاری تکمیل یقینی بنائی جائے۔