ویمنز کرکٹ ورلڈ کپ 2025 کے شیڈول اور وینیوز کا اعلان

آئی سی سی نے ویمنز کرکٹ ورلڈ کپ 2025 کے شیڈول اور وینیوز کا اعلان کردیا۔

ویمنز کرکٹ ورلڈ کپ 30 ستمبر سے 2 نومبر تک بھارت اور سری لنکا میں پانچ مقامات پر کھیلا جائے گا، بھارت میں خواتین ورلڈ کپ کا انعقاد 12 سال بعد ہو رہا ہے۔50اوورز پر مشتمل خواتین کے اس 13ویں ورلڈ کپ میں آٹھ ٹیموں کے درمیان میچز کھیلے جائیں گے۔ٹورنامنٹ میں شامل ٹیموں میں پاکستان، بھارت، آسٹریلیا، انگلینڈ، جنوبی افریقا، نیوزی لینڈ، سری لنکا، بنگلا دیش شامل ہیں۔
وینیوز میں بنگلورو کا ایم چناسوامی اسٹیڈیم، گوہاٹی کا اے سی اے اسٹیڈیم، اندور کا ہولکر اسٹیڈیم، وشاکھاپٹنم کا اے سی اے-وی ڈی سی اے اسٹیڈیم اور کولمبو کا آر. پریماداسا اسٹیڈیم شامل ہیں۔

ٹورنامنٹ کا پہلا سیمی فائنل 29 اکتوبر کو گوہاٹی یا کولمبو میں سے کسی ایک مقام پر ہوگا جبکہ دوسرا سیمی فائنل 30 اکتوبر کو بنگلورو میں کھیلا جائے گا، فائنل اتوار 2 نومبر کو بنگلورو یا کولمبو میں سے کسی ایک مقام پر ہوگا۔

ورلڈ کپ کا افتتاحی میچ 30 ستمبر کو بنگلور میں ہوگا جس میں ایک ٹیم بھارت ہوگی جبکہ مدمقابل ٹیم کا اعلان ابھی نہیں کیا گیا۔
واضح رہے کہ چیئرمین پی سی بی محسن نقوی نے اپنے بیان میں کہا تھا کہ پاکستان ویمن کرکٹ ٹیم ورلڈ کپ کھیلنے بھارت نہیں جائے گی، اس بات کا معاہدہ پہلے ہی ہوچکا ہے۔

محسن نقوی کا کہنا تھا کہ بھارت میزبان ہے وہ فیصلہ کرے گا کہ کہاں کھلانا ہے، ہم بھارت کے سوا کسی بھی جگہ کھیلنےکو تیار ہیں۔
یاد رہے کہ بھارت نے چیمپئنز ٹرافی کیلئے پاکستان آنے سے انکار کردیا تھا جس پر ہائبرڈ ماڈل کے تحت بھارت کے میچز دبئی میں ہوئے تھے۔
اس موقع پر معاہدے میں یہ طے پایا تھا کہ پاکستان بھی بھارت میں ہونے والے آئی سی سی ٹورنامنٹس کے میچز نیوٹرل وینیوز پر کھیلے گا۔