بھارت : جے پور میں سیلفی لینے والے 11افراد آسمانی بجلی گرنے سے ہلاک

تفصیلات کے مطابق   بھارت میں جے پور کے سیاحتی مقام امر قلعہ پر یہ   افسوس ناک واقعہ پیش آیا ،  قلعے  پر موجود  افراد موبائل فون سے سیلفیاں لے رہے تھے کہ اس دوران ان پر آسمانی بجلی آگری ، جس کے نتیجے میں 11 افرادجان کی بازی ہار گئے   ۔  اس  وقت قلعے میں  تقریبا ً27 افراد موجود تھے ، جن میں سے کچھ  اپنی جانیں بچانے کے لئے  قلعے سے زمین پر کود پڑے۔ پولیس حکام  کے مطابق امر  قلعہ ایک مشہور سیاحتی مقام ہے اور اس  واقعے میں   ہلاک ہونے والوں میں زیادہ تر تعداد نوجوانوں کی ہے ۔

مقامی میڈیا رپورٹس کے مطابق بھارت کی ریاستیں  اتر پردیش ، مدھیا پردیش اور راجستھان میں بجلی گرنے سے اب تک  68 لوگ جان سے ہاتھ دھو بیٹھے ہیں ۔

خیال رہے کہ بھارت میں  ہر سال بجلی گرنے سے بہت سے لوگوں کی موت ہو جاتی ہے اور اس طرح کے بیشتر واقعات خاص طور پر ملک کی شمالی ریاستوں میں پیش آتے ہیں۔ بھارت میں مون سون کا موسم عروج  پر ہے ، جس میں بارشیں خوب ہوتی ہیں اور شمال مشرقی ریاستوں میں مون سون ہوائیں بڑی رفتار سے پہنچتی ہیں، ایسی جگہوں پر آسمانی بجلی گرنے کا خدشہ ہمیشہ رہتا ہے، بارشوں کا یہ موسم  جون سے ستمبر تک رہتا ہے۔