عمران خان کشمیر آکر اپنا وقت ضائع نہ کریں : مریم نواز

تفصیلات کے مطابق پاکستان مسلم لیگ ن کی نائب صدر مریم نواز نے جلسے سے خطاب کرتے ہوئے کہا کہ وادی لیپہ کے عوام کو کشمیر کے بیٹے نواز شریف، شہباز شریف کا سلام۔آپ کا جذبہ بتا رہا ہے کشمیر میں پھر شیر آ رہا ہے، میں راجہ فاروق سے کہہ رہی تھی کہ  میں آپ کا اور کشمیر کا خصوصی شکریہ ادا کرنا چاہتی ہوں۔

انہوں نے کہاکہ  میں یہاں ووٹ مانگنے نہیں آئی بلکہ میں اس بات پر خوش ہوں کہ اس کمپین نے مجھے کشمیر کے چپے چپے کی سیر کروادی ۔ وفاق سے ملنے والا بجٹ کشمیریوں کا حق ہے۔ کشمیریوں کا حق کوئی چھین لے ، نواز شریف اور مریم نواز یہ برداشت نہیں کر سکتے۔

مریم نواز نے مزید کہاکہ سنا ہے عمران خان یہاں ووٹ مانگنے آ رہے ہیں، کیا کشمیر کی ترقی روکنے، آٹا، چینی چوری کرنے آ رہے ہیں، عمران خان نے تین سال میں پاکستان کی ترقی کو ریورس گیئر لگا دیا، عمران خان آئیں تو ان سے پوچھنا کیا کشمیر کو بھی ریورس گیئر لگانے آئے ہیں، روزہ داروں کو ایک کلو چینی کیلئے قطاروں میں لگایا گیا، عمران خان کی نالائقی، نااہلی سے ملک میں مہنگائی کا طوفان آیا ہوا ہے ، پی ٹی آئی حکومت کے دورمیں ادویات کی قیمتیں کئی گنا بڑھ گئیں۔  

انہوں نے کہاکہ ایک جماعت ایسی بھی ہے جو عوام کی خدمت کےبجائے ووٹ چوری کرنے کی ماہر ہے، وہ جماعت آر ٹی ایس کا بٹن نہیں دباتی، الیکشن کمیشن کا عملہ اٹھا کر لےجاتی ہے۔

مریم نواز نے کہاکہ عمران خان کے وزرا کھلے عام پیسے بانٹتے رنگے ہاتھوں پکڑے گئے ہیں، عمران خان کو سادہ اکثریت کے لالے پڑے ہوئے ہیں،یہ نواز شریف کا میدان میں مقابلہ نہیں کرسکتا، بزدل آدمی ہے۔

 لیگی نائب صدر نے مزید  کہاکہ عدالت کہتی ہے نواز شریف ، شہباز شریف، شاہد خاقان، حمزہ شہباز پر کرپشن کا کوئی الزام نہیں، کرپشن کا بیانیہ منہ کے بل زمین پر پڑا ہے، تمہیں تین سال بعد بھی نواز شریف کو ہرانے کیلئے الیکشن چوری کرنا پڑتا ہے۔