لبنانی فوج نے سیر کیلئے ہیلی کاپٹر کرائے پر چلانے شروع کردیے

غیر ملکی خبر رساں ادارے کے مطابق  لبنان میں معاشی زبوں حالی کے اثرات فوج پر بھی پڑنے لگے ہیں، یہی وجہ ہے کہ فوج نے اپنے ہیلی کاپٹرز کو سیر کرانے کے لیے چلانا شروع کردیا ہے۔

لبنانی فوج کے ترجمان کرنل حسن برکات کا کہنا ہے کہ " ہم جس جنگ سے لڑ رہے  ہیں وہ معاشی ہے لہٰذا اس کے لیے غیر روایتی طریقے اختیار کرنے کی ضرورت ہے، پھر ہمیں ہیلی کاپٹر ٹورز شروع کرنے کا خیال آیا۔"

" ان ٹرپس  سے طیاروں کی ضروری مرمت کے لیے پیسے جمع ہوجاتے ہیں، آرمی کے رابنسن آر 44 تربیتی ہیلی کاپٹر پر 15 منٹ کی ایک رائیڈ کا کرایہ 150 امریکی ڈالرز ہے۔"

ورلڈ بینک کے مطابق  لبنان کو سنگین معاشی بحران کا سامنا ہے، لبنانی کرنسی اپنی قدر 90 فیصد کھو چکی ہے اور آدھی سے زائد آبادی غربت میں جا چکی ہے۔

خیال رہےکہ لبنانی آرمی کمانڈر جنرل جوزف عون نے گذشتہ ماہ  کہا تھا کہ   دہائیوں سے حکومتی کرپشن اور فضول خرچیوں کی وجہ سے پیدا ہونے والا بحران فوج سمیت تمام ریاستی اداروں کو منہدم کردے گا۔

گزشتہ ہفتے  قطر نےاعلان کیا تھا  کہ وہ لبنانی فوج کو ماہانہ 70 ٹن خوراک فراہم کرے گا۔