کراچی: راشد منہاس روڈ پر تیز رفتار ڈمپر کار پر الٹ گیا، دو افراد جاں بحق جبکہ دو زخمی

شہر قائد میں راشد منہاس روڈ کے قریب ایک افسوسناک ٹریفک حادثے میں تیز رفتار ڈمپر کار پر الٹ گیا، جس کے نتیجے میں گاڑی مکمل طور پر تباہ ہو گئی۔

حادثہ ڈرگ روڈ کے قریب پیش آیا جہاں ایک خاتون اور ایک بچی موقع پر ہی جاں بحق ہو گئیں، جبکہ ایک اور بچی کو شدید زخمی حالت میں اسپتال منتقل کیا گیا ہے۔ ریسکیو ذرائع کے مطابق، ڈمپر کے نیچے آ جانے سے گاڑی مکمل طور پر تباہ ہو گئی اور افراد گاڑی میں پھنس گئے تھے۔

حادثے کے بعد موقع پر ہیوی کرین اور لفٹر طلب کر لیا گیا، جس کی مدد سے ڈمپر کو گاڑی کے اوپر سے ہٹا کر لاشوں اور زخمیوں کو نکالا گیا۔ ریسکیو ٹیموں نے فوری کارروائی کرتے ہوئے امدادی سرگرمیاں انجام دیں۔

پولیس کے مطابق متاثرہ گاڑی میں چار افراد سوار تھے جو اسکیم 33 کے رہائشی تھے۔ حادثے کے نتیجے میں 48 سالہ خاتون شاہینہ اور 10 سالہ بچی عائشہ زخموں کی تاب نہ لاتے ہوئے دم توڑ گئیں، جبکہ دیگر دو زخمیوں کو طبی امداد کے لیے اسپتال منتقل کردیا گیا۔

واقعے کے بعد ڈمپر کا ڈرائیور موقع سے فرار ہو گیا، جس کی تلاش پولیس نے شروع کر دی ہے۔ ابتدائی تحقیقات کے مطابق ڈمپر کی رفتار بہت زیادہ تھی اور وہ بجری سے بھرا ہوا تھا، جس کے باعث یہ خوفناک حادثہ پیش آیا۔