عراق : کورونا وارڈ میں آتشزدگی سے 52افراد ہلاک

غیر ملکی خبررساں ادارے کے مطابق  ناصریہ کے الحسین  ہسپتال میں لگنے والی آگ پر قابو پالیا گیا ہے ، حادثے میں   16 افراد کو ریسکیو کر لیا گیا ہے  جبکہ درجنوں  زخمی ہیں جن میں سے دو افراد کی حالت نازک بتائی جارہی  ہے۔ حکام کا کہنا ہے کہ کورونا وارڈ میں مزید افراد کی موجودگی کی اطلاعات ہیں ۔ ابتدائی اطلاعات کے مطابق  آگ آکسیجن سلنڈر پھٹنے کی وجہ سے لگی ، تاہم ابھی تک واضح طور پر آگ کی وجہ معلوم کی جارہی ہے۔

حکام کے مطابق اس ہسپتال  میں یہ نیا وارڈ صرف تین ماہ قبل تعمیر کیا گیا تھا جس میں 70 بیڈز  کی گنجائش تھی ۔ محکمہ صحت کے عہدیدار کاکہنا ہے  کہ آگ لگنے کے وقت کم از کم 63 افراد وارڈ میں موجود تھے ۔

اپریل میں دارالحکومت بغداد کے ایک اسپتال میں  آکسیجن ٹینک میں آگ لگنے سے   کم از کم 82 افراد ہلاک ہوگئے تھے ۔ اس آگ کے بعد وزیر صحت  التمیمی نے استعفیٰ دے دیا تھا۔

کورونا وائرس  کے باعث  عراق کی صحت کا شعبہ شدید دباؤ کا شکار ہے ،جان ہاپکنز یونیورسٹی کے اعداد و شمار کے مطابق  عراق میں 1.4 ملین  کیسز  ریکارڈ ہوئے ہیں اور کورونا وائرس سے 17ہزار افراد جان سے ہاتھ دھوبیٹھے ہیں ۔