قطر پرایرانی میزائل حملہ ناقابل قبول اور سفارتی آداب کی خلاف ورزی ہے، قطری وزیراعظم

دوحہ: قطری وزیر اعظم محمد بن عبدالرحمٰن جاسم نے کہا ہے کہ قطر کی ریاست پرایرانی میزائل حملہ ناقابل قبول اور سفارتی آداب کی خلاف ورزی ہے۔

 دوحہ میں لبنانی وزیر اعظم کے ہمراہ پریس کرتے ہوئے قطری وزیر اعظم نے کہا کہ قطر میں امریکی اڈے پر ایران کے حملے کی سخت مذمت کرتے ہیں۔ 

 پریس کانفرنس کرتے ہوئے قطری وزیر اعظم نے کہا کہ ایران کے حملے پر ہمیں حیرت ہوئی تھی، کل جو ہوا وہ قطری عوام کےلیے دھچکا تھا، اس حملے کی مذمت کرتے ہیں،ان کا مزید کہنا تھاکہ ایران کے حملے قطر اور ایران کے تعلقات پر اثر ڈالیں گے مگر امید ہے کہ ہمسائیگی پر مبنی تعلقات کو نقصان نہیں پہنچے گا۔ 

قطری وزیر اعظم نے مسلح افواج کی کارگردگی کو سراہتے ہوئے کہا کہ ہمارے ایئر ڈیفنس نے کامیابی سے ایرانی حملہ ناکام بنایا، ہماری افواج قطر کی خودمختاری کی حفاظت کرسکتی ہے۔

ان کامزید کہنا تھا کہ ایران اسرائیل تنازع کا سفارتی حل چاہتے ہیں، اُمید ہے سفارتکاری کامیاب اور جنگ بندی برقرار رہے گی، قطری امیر کو ایرانی صدر کی کال موصول ہوئی تھی، ایرانی صدر نے قطر میں امریکی اڈے کو نشانہ بنانے پراظہار افسوس کیا۔

انہوں نے کہا کہ آئندہ دو روز میں غزہ میں جنگ بندی کے لیے حماس اور اسرائیل کے درمیان بلا واسطہ بات چیت شروع ہوگی، امید کرتے ہیں کہ اسرائیل ایران کیساتھ جنگ بندی کا فائدہ اٹھاتے ہوئے غزہ میں جارحیت نہیں بڑھائے گا۔

انہوں نے کہا کہ خلیج تعاون کونسل کی دوست ریاستوں کا شکریہ ادا کرتے ہیں، ایران اسرائیل جنگ بندی معاہدے پر اتفاق کیا۔ محمد بن عبدالرحمٰن جاسم کا کہنا ہے کہ لبنان کے پڑوسی ممالک کے ساتھ تعلقات معمول پر لانے کی خواہش کی حمایت کرتے ہیں، خطے میں امن کے خواہاں ہیں۔

 دوران پریس کانفرنس لبنانی وزیراعظم نواف سلام نے کہا کہ حملے پر قطرکے ساتھ اظہاریکجہتی کرتے ہیں جب کہ اسرائیلی حملے ایران کی خودمختاری کی خلاف ورزی تھے، ایران کی خودمختاری کو کسی صورت نقصان نہیں ہونا چاہیے۔