نامور اداکار یاسر نواز کے بھائی انتقال کر گئے

کراچی:معروف اداکار یاسر نواز کے بھائی وقار نواز انتقال کر گئے۔

فوٹوز اینڈ ویڈیوز شیئرنگ پلیٹ فارم انسٹاگرام پر یاسر نواز نے اپنے بھائی کے انتقال کی خبر مداحوں کو دے کر اپنے غم میں شریک کرلیا۔

انہوں نے انسٹااسٹوری شیئر کرتے ہوئے لکھا، ’انا للّٰہ و انا الیہ راجعون، ہمیں یہ بتاتے ہوئے انتہائی دکھ و افسوس ہے کہ ہمارے پیارے اور شفیق بھائی وقار نواز انتقال کرگئے ہیں۔

معروف میزبان و اداکارہ ندا یاسر کے شوہر یاسر نواز نے غم کا اظہار کرتے ہوئے اپنے بھائی کی مغفرت کی دعا کی اور مداحوں سے ان کی مغفرت کی دعا کرنے کی اپیل کی۔ 

اداکار نے اپنے چھوٹے بھائی دانش نواز اور ڈاکٹر فراز نواز کو بھی اپنی انسٹا اسٹوری پر ٹیگ کیا،  تاہم ان کی جانب سے بھائی کے انتقال کی وجہ بتانے سے گریز کیا گیا ہے۔

انہوں نے بھائی کی مغفرت کی دعا کرتے ہوئے مزید لکھا کہ اللّٰہ تعالیٰ ان کی غلطیوں اور کوتاہیوں کو معاف فرمائے، انہیں جنت الفردوس میں اعلیٰ مقام عطا فرمائے اور اہل خانہ کو صبر جمیل عطا فرمائے، آمین۔‘

مداح یاسر نواز کے بھائی کے انتقال پر افسوس کا اظہار کرتے ہوئے ان کے گھر والوں کیلئے صبر کی دعا کر رہے ہیں۔