اسرائیل کی دو ہفتوں میں غزہ جنگ ختم کرنے کی پیشکش، مشروط جنگ بندی کا منصوبہ زیر غور

اسرائیلی اخبار اسرائیل ہیوم نے دعویٰ کیا ہے کہ اسرائیل آئندہ دو ہفتوں میں غزہ میں جنگ ختم کرنے پر آمادہ ہو گیا ہے، تاہم اس کے لیے متعدد شرائط رکھی گئی ہیں۔

رپورٹ کے مطابق یہ پیشرفت اسرائیلی وزیر اعظم بنیامن نیتن یاہو اور امریکی صدر ڈونلڈ ٹرمپ کے درمیان ایک اہم ٹیلی فونک گفتگو کے دوران سامنے آئی، جس میں امریکی وزیر خارجہ مارکو روبیو اور اسرائیلی وزیر برائے اسٹریٹجک امور رون ڈرمر بھی شریک تھے۔

ذرائع کے مطابق مجوزہ منصوبے میں حماس کی قیادت کو جلاوطن کرنے، یرغمالیوں کی رہائی، اور غزہ میں متحدہ عرب امارات، مصر اور دو دیگر عرب ممالک کی زیرنگرانی ایک مشترکہ عبوری حکومت کے قیام کی تجاویز شامل ہیں۔

تاہم کئی عرب ممالک پہلے ہی واضح کر چکے ہیں کہ جب تک فلسطینی اتھارٹی کو غزہ میں مرکزی کردار نہ دیا جائے، وہ اس منصوبے کا حصہ نہیں بنیں گے۔ اس کے برعکس نیتن یاہو فلسطینی اتھارٹی کے کسی بھی کردار کو مسترد کرتے رہے ہیں، جبکہ حماس نے بھی جلاوطنی کے کسی بھی مطالبے کو سختی سے رد کیا ہے۔

رپورٹ میں یہ بھی کہا گیا ہے کہ ایسے فلسطینی شہریوں کے لیے، جو غزہ چھوڑنا چاہیں، تیسرے ممالک میں آبادکاری کی راہ ہموار کی جا رہی ہے۔ علاوہ ازیں، سعودی عرب اور شام سمیت دیگر مسلم ممالک کے ساتھ اسرائیل کے ممکنہ سفارتی تعلقات پر بھی غور جاری ہے۔

منصوبے کے تحت اسرائیل، فلسطینی اتھارٹی میں اصلاحات کی صورت میں، مشروط طور پر دو ریاستی حل کی حمایت پر آمادہ ہو سکتا ہے، جب کہ امریکا مغربی کنارے کے کچھ حصوں پر اسرائیلی خودمختاری تسلیم کرنے پر تیار ہے۔

یہ تفصیلات ایک ایسے وقت سامنے آئی ہیں جب ایران کی مبینہ جنگ بندی خلاف ورزی کے بعد اسرائیل کے جوابی حملے پر امریکی صدر نے نیتن یاہو سے اظہارِ ناراضی کیا اور ان پر کرپشن مقدمات ختم کرنے کے لیے دباؤ ڈالا ہے۔

ماہرین کے مطابق یہ منصوبہ مشرق وسطیٰ میں ممکنہ طور پر ایک بڑی سیاسی تبدیلی کا آغاز ہو سکتا ہے، تاہم زمینی حقائق اور فریقین کے اختلافات اس کی راہ میں بڑی رکاوٹ ہیں۔