سی سی ڈی کا ایک روز میں چار مبینہ پولیس مقابلوں میں 6 ملزمان کو ہلاک کرنے کا دعویٰ

کرائم کنٹرول ڈیپارٹمنٹ (سی سی ڈی) نے مختلف شہروں میں ایک ہی دن میں چار مبینہ پولیس مقابلوں کے دوران چھ ملزمان کو ہلاک کرنے کا دعویٰ کیا ہے۔

ترجمان سی سی ڈی کے مطابق، یہ مقابلے لاہور، قصور، گوجرہ اور شیخوپورہ میں پیش آئے۔

قصور
قصور بائی پاس پر ڈاکوؤں کی موجودگی کی اطلاع پر کارروائی کی گئی۔ چھاپے کے دوران فائرنگ کے تبادلے میں دو ڈاکو مارے گئے جبکہ ان کا ایک ساتھی فرار ہوگیا۔ ترجمان کے مطابق، ہلاک ہونے والے دونوں افراد 50 سے زائد سنگین وارداتوں میں ملوث اور پولیس کو مطلوب تھے۔

گوجرہ
گوجرہ میں اشتہاری ملزمان کی موجودگی کی خفیہ اطلاع پر چھاپہ مارا گیا۔ فائرنگ کے تبادلے کے دوران دو ملزمان زخمی حالت میں گرفتار کیے گئے، جو قتل، ڈکیتی، راہزنی اور بھتہ خوری سمیت درجنوں مقدمات میں مفرور تھے۔

لاہور
لاہور کے علاقے شاہدرہ ٹاؤن میں قائم ناکے پر تین مشکوک افراد کو روکا گیا، جنہوں نے پولیس پر فائرنگ کر دی۔ فائرنگ کے دوران ایک ملزم اپنے ہی ساتھیوں کی گولی سے زخمی ہو کر اسپتال میں دم توڑ گیا۔ ترجمان کے مطابق، ہلاک ہونے والا شخص ڈکیتی اور راہزنی کی متعدد وارداتوں میں ریکارڈ یافتہ تھا۔

شیخوپورہ
سرگودھا روڈ، شیخوپورہ میں پولیس اور ڈاکوؤں کے درمیان جھڑپ کے نتیجے میں ایک ڈاکو مارا گیا جبکہ اس کے تین ساتھی فرار ہو گئے۔ ترجمان کے مطابق، ہلاک ڈاکو کی شناخت تاحال نہیں ہو سکی، جبکہ فرار ملزمان کی تلاش جاری ہے۔