پیٹرولیم قیمتوں میں اضافہ واپس لیا جائے: صدر انجمن تاجران اجمل بلوچ

 آل پاکستان انجمن تاجران کے صدر اجمل بلوچ نے حکومت سے پیٹرولیم مصنوعات کی حالیہ قیمتوں میں اضافے کو فوری واپس لینے کا مطالبہ کیا ہے۔ ان کا کہنا ہے کہ ایندھن کی قیمتوں میں اضافے سے مہنگائی مزید بڑھ جائے گی، جب کہ عوام پہلے ہی شدید مالی دباؤ کا شکار ہیں۔

ایک جاری کردہ بیان میں اجمل بلوچ نے کہا کہ "عوام کی قوتِ خرید ختم ہو چکی ہے، اور بجٹ میں بھی کوئی ایسی شق شامل نہیں کی گئی جس سے عام شہری کو ریلیف ملتا۔"

انہوں نے مزید کہا کہ اگر خریدار کے پاس پیسہ ہی نہیں ہوگا تو دکاندار خوشحال کیسے ہوگا؟ اور جب کاروباری طبقہ خوشحال نہیں ہوگا تو ملک کی معیشت کیسے بہتر ہو سکتی ہے؟

صدر انجمن تاجران نے بجلی و گیس کے بلوں پر بھی شدید تحفظات کا اظہار کرتے ہوئے کہا کہ "یہ بل عوام کی کمر توڑ چکے ہیں، اور موجودہ بجٹ میں وزیروں اور مشیروں کی تنخواہوں و مراعات میں اضافے نے عام آدمی پر مزید بوجھ ڈال دیا ہے۔"

ان کا کہنا تھا کہ عوام نہ صرف وزیروں مشیروں کی مفت بجلی، گیس اور پیٹرول کا خرچہ اٹھا رہے ہیں بلکہ بجلی و گیس چوری کا خمیازہ بھی بھگت رہے ہیں۔

اجمل بلوچ نے طنزیہ انداز میں کہا کہ "اب واحد حل یہی رہ گیا ہے کہ عوام اپنے گھر چھوڑ کر سڑکوں پر آ کر بیٹھ جائیں۔"