نو محرم الحرام آج ملک بھر میں عقیدت و احترام سے منایا گیا

نومحرم الحرام کا دن آج ملک بھر میں انتہائی عقیدت و احترام کے ساتھ منایا گیا ، جہاں حضرت امام حسینؑ اور ان کے جانثار رفقاء کی عظیم قربانیوں کو خراجِ عقیدت پیش کیا گیا ۔

اس موقع پر تمام چھوٹے بڑے شہروں میں مجالسِ عزا کا انعقاد کیا گیا، جب کہ متعدد علاقوں میں تعزیوں اور علم کے جلوس نکالے گئے۔

وفاقی دارالحکومت اسلام آباد میں نو محرم کا مرکزی جلوس جی سکس ٹو کی امام بارگاہ سے برآمد ہوا، جو اپنے روایتی راستوں سے گزرتا ہوا وہیں اختتام پذیر ہو ا۔

جلوسوں اور مجالس کے دوران کسی بھی ناخوشگوار واقعے سے بچنے کے لیے سیکیورٹی کے فول پروف انتظامات کیے گئے ۔

وزیر داخلہ محسن نقوی کی ہدایت پر عاشورہ سیکیورٹی پلان کے تحت اسلام آباد میں پہلی مرتبہ ایک موبائل کنٹرول روم قائم کیا گیا ہے، جو بغیر موبائل سگنلز کے بھی نگرانی اور رابطوں کی بلاتعطل سہولت فراہم کرنے کی صلاحیت رکھتا ہے۔