لاہور میں نائجیرین خاتون کو ہراساں کرنے والا ملزم 12 گھنٹے میں گرفتار

لاہور کے علاقے گرین ٹاؤن میں ایک غیر ملکی (نائجیرین) خاتون کو ہراساں اور بدتمیزی کا نشانہ بنانے والے ملزم کو چند گھنٹوں کے اندر گرفتار کر لیا گیا۔

ڈی آئی جی آپریشنز فیصل کامران کی ہدایت پر سپیشل پولیس ٹیم نے بروقت کارروائی کرتے ہوئے ملزم حسن کو حراست میں لے لیا۔ پولیس کے مطابق واقعے کی اطلاع ملتے ہی گرین ٹاؤن تھانے میں مقدمہ درج کر کے تفتیش کا آغاز کیا گیا۔ سیف سٹی کیمروں اور دیگر سی سی ٹی وی فوٹیج کی مدد سے 12 گھنٹے کے اندر ملزم کی شناخت اور گرفتاری ممکن ہوئی۔

ڈی آئی جی آپریشنز نے ایس پی صدر ڈاکٹر غیور، ایس ایچ او خرم شہزاد اور دیگر پولیس اہلکاروں کو فوری کارروائی پر شاباش دی۔ ان کا کہنا تھا کہ "خواتین اور بچے ریاست کی ریڈ لائن ہیں، ہراسانی کسی صورت برداشت نہیں کی جائے گی۔ خواتین سے بدسلوکی پر زیرو ٹالرنس پالیسی پر عملدرآمد جاری رہے گا۔"

یاد رہے کہ ڈی آئی جی فیصل کامران نے واقعے کا نوٹس لیتے ہوئے ملزم کی فوری گرفتاری کے لیے خصوصی ٹیم تشکیل دی تھی، جس نے مؤثر حکمتِ عملی کے تحت کامیابی سے کارروائی مکمل کی۔