عبدالستار ایدھی انسان دوستی کی عظیم مثال ہیں، قوم ان کے مشن کی وارث ہے: وزیراعظم شہباز شریف

وزیراعظم محمد شہباز شریف نے ممتاز سماجی رہنما اور خدمتِ خلق کی عالمی پہچان عبد الستار ایدھی کی 9ویں برسی کے موقع پر ان کی عظیم خدمات کو دلی خراج عقیدت پیش کرتے ہوئے کہا ہے کہ ایدھی صاحب نے انسانیت کی خدمت کی ایسی تاریخ رقم کی جو ہمیشہ یاد رکھی جائے گی۔

اپنے خصوصی پیغام میں وزیراعظم نے کہا کہ عبدالستار ایدھی نہ صرف پاکستان بلکہ پوری دنیا کے لیے انسان دوستی، ہمدردی اور ایثار کا روشن استعارہ تھے۔ وہ اس قوم کا انمول سرمایہ تھے جنہوں نے خدمت کو اپنی زندگی کا نصب العین بنا لیا۔

شہباز شریف نے کہا کہ آج پوری قوم ان کی برسی کے موقع پر ان کی بے مثال قربانیوں کو یاد کر رہی ہے اور اس عزم کی تجدید کر رہی ہے کہ ایدھی صاحب کے مشن کو جاری رکھا جائے گا۔ وزیراعظم نے نوجوانوں پر زور دیا کہ وہ عبد الستار ایدھی کے فلاحی مشن کو آگے بڑھانے میں پیش پیش ہوں۔