لاہور سمیت پنجاب کے بیشترمیدانی علاقوں میں شدید دھند

صوبائی دارالحکومت لاہور   نے دھند کی سفید چادر اوڑھ لی ،   شدید سردی اور دھند سے معمولات زندگی درہم برہم ہوگئے، دھند کے باعث ایم  ٹو، اورایم فور پنڈی بھٹیاں سے فصل آ باد تک،  ایم تھری لاہور تا عبدالحکیم، لاہور سیالکوٹ اور موٹروےایم 3لاہورسےسمندری  ہر قسم کی ٹریفک کےلیے بند کردیا گیا، شہر کے خارجی و داخلی راستے بھی دھندلے پڑ گئے، دھند کے باعث کرم اللہ چوک سے خانقاہ ڈوگراں انٹر چینج تک سڑک بند کردی گئی۔ پنجاب کے دیگر شہروں   مانگا منڈی ، پھول نگر اور جمبر پتوکی ، اوکاڑہ ، اقبال نگر ،چیچہ وطنی اور میاں چنوں میں  بھی شدید دھند ہے ۔ترجمان کے مطابق قومی شاہراہ پر ان علاقوں میں حد نگاہ 30میٹر ہے۔

محکمہ موسمیات کے مطابق لاہور میں  ہوا میں نمی کا تناسب 100 فیصد تک پہنچ گیا، آج شہر میں کم سے کم درجہ حرارت  8 اور زیادہ سے زیادہ 24 ڈگری سینٹی گریڈ رہنے کا امکان ہے جبکہ صبح اور رات کے اوقات میں میدانی علاقوں میں دھند پڑنے کا امکان ہے ۔ لاہور کی اہم شاہراہوں پر ٹریفک کی روانی متاثر ہے، جس کی وجہ سے شہریوں کو شدید مشکلات کا سامنا کرنا پڑ رہا ہے۔

ترجمان موٹروے پولیس نے شہریوں کو غیر ضروری سفر اور تیز رفتاری سے اجتناب کرنے اور دوران ڈرائیونگ فوگ لائٹس استعمال کرنے کی ہدایت کردی، موٹروے پولیس کے مطابق شہری سفر شروع کرنےسے پہلے ہیلپ لائن 130سےمدد لیں۔ترجمان کاکہنا ہے کہ موٹروے روڈ یوزرز کی حفاظت کے لیے بند کی گئی ہے،  موٹروے پولیس کے مطابق جیسے ہی دھند کم ہو گی ٹریفک کو کھول دیا جائے گا۔