اپر کوہستان میں گاڑی کو حادثہ 13 افراد جانبحق جبکہ 36 افراد زخمی

رپورٹ : شہزاد نوید

تفصیلات کے مطابق ڈپٹی کمشنر محمد عارف یوسفزئی نے واقعے کے حوالے سے جی این این کو بتایا ہے کہ زخمیوں اور لاشوں کو آر ایچ سی داسو منتقل کیا گیا ہے جبکہ حادثے کی نوعیت جاننے کے لئے تفتیش کی جا رہی ہے انہوں نے مزید بتایا کہ گاڑی کے انجن میں خرابی یا اس کے ساتھ ڈیم کے لئے بارود لے جانے والی گاڑی کے حوالے سے کچھ کہنا قبل از وقت ہے جبکہ حتمی طور پر تفتیش مکمل ہونے تک کچھ کہا نہیں جا سکتا ہے ۔

خیبر پختونخواہ کے ضلع اپر کوہستان کے پولیس حکام کے  مطابق داسو ڈیم جانے والی گاڑی پر برسین لیبر کیمپ کے قریب حادثہ ہوا ہے جس میں ایف سی اہلکار، مقامی لوگ اور 8 چائنہ سے تعلق رکھنے والے ماہرین جاںبحق جبکہ 36 افراد زخمی ہوگئے ہیں۔ زخمیوں میں بھی زیادہ تر سکیورٹی اہلکار اور غیرملکی ماہرین شامل ہیں ۔

دوسری جانب وزیراعلیٰ خیبرپختونخوا  نے واقعے کے فورا بعد ایک اعلیٰ سطحی حکومتی وفد کوہستان روانہ کر دیا ہے ، جس میں حکومتی ترجمان کامران بنگش، چیف سیکرٹری اور آئی جی پی خیبرپختونخوا شامل ہیں کامران بنگش نے اپنے ٹویٹ میں کہا ہے کہ واقعے کے حوالے سے تفصیلات معاملے کی جانچ کے بعد جاری کئے جائیں گے ۔