اداکارہ حمیرا اصغر کی نماز جنازہ لاہور میں ادا کردی گئی

لاہور: شہر قائد کے علاقے ڈیفنس کے ایک فلیٹ میں مردہ پائی جانے والے اداکارہ حمیرا اصغر کی نماز جنازہ ادا کردی گئی۔

تفصیلات کے مطابق معروف اداکارہ حمیرا اصغر کی نماز جنازہ لاہور ماڈل ٹاؤن میں ادا کردی گئی، جس کے بعد اداکارہ حمیرا اصغر کی میت کیو بلاک قبرستان پہنچا دی گئی، جہاں ان کی تدفین کی گی۔

خیال رہے کہ اداکارہ حمیرا اصغر کی اچانک موت سے شوبز حلقوں اور مداحوں میں گہرے رنج و غم کی فضا ہے، ان کے انتقال کی وجوہات جاننے کے لیے تحقیقات کا عمل بھی جاری ہے۔

واضح رہے کہ گزشتہ دنوں حمیرا اصغر کی لاش کراچی کے علاقے ڈیفنس میں ایک فلیٹ سے اُس وقت ملی تھی، جب پولیس عدالتی حکم پر مکان مالک کی شکایت پر فلیٹ خالی کرانے پہنچی تھی۔

دوسری جانب پوسٹ مارٹم کرنے والی پولیس سرجن ڈاکٹر سمیہ سید کے مطابق لاش گلنے سڑنے کے انتہائی مرحلے میں داخل ہو چکی تھی اور اس قدر مسخ ہو گئی تھی کہ فوری طور پر موت کی وجہ بیان کرنا ممکن نہیں۔

پولیس اداکارہ کی موت کی وجہ کا تعین کرنے کے لیے تفتیش جاری رکھے ہوئے ہے۔