ذوالفقار علی بھٹو جونیئر کا نئی سیاسی جماعت بنانے کا اعلان، نعرہ ہوگا ’جئے عوام‘

لاہور: سابق وزیراعظم اور پاکستان پیپلز پارٹی کے بانی ذوالفقار علی بھٹو کے پوتے، ذوالفقار علی بھٹو جونیئر نے ایک نئی سیاسی جماعت بنانے کا اعلان کردیا ہے۔

لاہور پریس کلب میں پریس کانفرنس سے خطاب کرتے ہوئے انہوں نے کہا کہ وہ جلد ایک نئی سیاسی جماعت کا باقاعدہ اعلان کریں گے۔ ان کا کہنا تھا کہ بھٹو کا مشہور نعرہ "روٹی، کپڑا اور مکان" آج بھی زندہ ہے، تاہم وقت کے تقاضوں کے مطابق اب بجلی، گیس اور پانی بھی بنیادی ضرورت بن چکے ہیں۔ ان کی جماعت کا نیا نعرہ ہوگا: "جئے عوام"۔

ذوالفقار علی بھٹو جونیئر نے الزام عائد کیا کہ زرداری گروپ نے ’جئے بھٹو‘ کو کرپشن سے جوڑ دیا ہے۔ انہوں نے کہا کہ کارپوریٹ فارمنگ کے نام پر کسانوں کی زمینوں پر قبضے کی منصوبہ بندی کی جا رہی ہے، حالانکہ پنجاب کے کسان ملکی معیشت میں ریڑھ کی ہڈی کی حیثیت رکھتے ہیں۔

انہوں نے سوال اٹھایا کہ وہ جماعتیں کہاں گئیں جو کسانوں کے حقوق کی بات کرتی تھیں؟ ساتھ ہی خبردار کیا کہ اگر سندھ کے کسان بھی پنجاب کی طرح آواز بلند کریں گے تو وہ سب اسلام آباد کی طرف مشترکہ مارچ کریں گے۔