اداکارہ حمیرا اصغر کی موت: پولیس نے موبائل فونز اور لیپ ٹاپ کا ڈیٹا حاصل کرلیا

ڈیفنس فیز 6 کے ایک فلیٹ سے مردہ حالت میں ملنے والی اداکارہ حمیرا اصغر کے کیس میں تحقیقات نے نئی پیش رفت اختیار کرلی ہے۔ پولیس نے مرحومہ کے زیر استعمال موبائل فونز، لیپ ٹاپ اور دیگر الیکٹرانک آلات کا ڈیٹا حاصل کرلیا ہے۔

تحقیقاتی حکام کے مطابق حمیرا اصغر کے قبضے میں تین موبائل فونز، ایک ٹیبلٹ اور ایک لیپ ٹاپ موجود تھے۔ ان ڈیوائسز کے پاس ورڈز ان کی ذاتی ڈائری میں درج تھے، جن کی مدد سے پولیس نے تمام گیجٹس کو کھول کر اہم معلومات حاصل کی ہیں۔

پولیس نے بتایا کہ کیس کی تفتیش میں اب تک دو افراد کے بیانات قلمبند کیے جا چکے ہیں، جبکہ مزید دو افراد کو طلب کیا گیا ہے۔ تفتیشی ٹیم کے مطابق اداکارہ باقاعدگی سے جِم اور بیوٹی سیلون جاتی تھیں، اس لیے ان کے جم ٹرینر اور دیگر متعلقہ افراد سے بھی تحقیقات میں مدد لی جائے گی۔

مزید برآں، پولیس نے انکشاف کیا ہے کہ اداکارہ کے چند مخصوص افراد سے روابط تھے، جن کی جانچ پڑتال کی جا رہی ہے۔ ساتھ ہی اداکارہ کے بینک اکاؤنٹس کی چھان بین بھی جاری ہے تاکہ موت کے محرکات کو واضح کیا جا سکے۔

واضح رہے کہ اداکارہ حمیرا اصغر کو کچھ روز قبل کراچی کے علاقے ڈیفنس فیز 6 کے ایک فلیٹ میں مردہ پایا گیا تھا، بعد ازاں انہیں لاہور میں سپردِ خاک کر دیا گیا۔