پی ٹی آئی قیادت کا قافلہ لاہور پہنچ گیا

پاکستان تحریک انصاف (پی ٹی آئی) کی مرکزی قیادت اور ارکانِ اسمبلی پر مشتمل قافلہ اسلام آباد سے لاہور پہنچ گیا ہے۔ قافلے کی قیادت وزیر اعلیٰ خیبرپختونخوا علی امین گنڈاپور اور چیئرمین پی ٹی آئی بیرسٹر گوہر علی خان نے کی۔

قافلے کی آمد کے موقع پر شاہدرہ موڑ پر سیکیورٹی کے سخت انتظامات کیے گئے، جہاں پولیس کی بھاری نفری تعینات رہی۔ اس دوران پی ٹی آئی کے رہنما یاسر گیلانی سمیت چار کارکنان کو حراست میں لیا گیا، تاہم کچھ دیر بعد یاسر گیلانی کو رہا کر دیا گیا۔

پولیس نے شاہدرہ موڑ پر کسی کو رکنے یا بات کرنے کی اجازت نہیں دی، جس کے باعث قافلہ میڈیا سے گفتگو کیے بغیر آگے بڑھ گیا۔ قافلہ بعد ازاں رائے ونڈ روڈ پر واقع آفریدی فارم ہاؤس کی جانب روانہ ہوا، جہاں پارٹی کے ارکانِ اسمبلی کے اعزاز میں عشائیے کا اہتمام کیا گیا ہے۔

اسی مقام پر پی ٹی آئی کی پارلیمانی کمیٹیوں کا اہم اجلاس بھی منعقد ہوگا، جس میں آئندہ کے احتجاجی لائحہ عمل اور سیاسی حکمت عملی پر مشاورت کی جائے گی۔

قبل ازیں، روانگی سے پہلے اسلام آباد میں خیبرپختونخوا ہاؤس میں پارٹی قیادت کا اجلاس ہوا، جس کے بعد کارکنان اور رہنما قافلے کی صورت میں لاہور کے لیے روانہ ہوئے۔

روانگی سے قبل میڈیا سے گفتگو کرتے ہوئے وزیر اعلیٰ کے پی علی امین گنڈاپور نے کہا کہ یہ قافلہ پنجاب اسمبلی سے نکالے گئے عوامی نمائندوں سے اظہارِ یکجہتی کے لیے روانہ ہوا ہے۔ ان کا کہنا تھا کہ ہم پرامن اور جمہوری طریقے سے غیر قانونی، غیر آئینی اور غیر اخلاقی اقدامات کے خلاف ردعمل ظاہر کر رہے ہیں۔