بٹ کوائن تاریخ کی بلند ترین سطح کو چھو گیا،نئی قیمت ایک لاکھ 22 ہزار ڈالر سے تجاوز

ویب ڈیسک: دنیا کی سب سے بڑی اور مقبول کرپٹو کرنسی بٹ کوائن نے پیر کے روز نئی تاریخ رقم کر دی، جب اس کی قیمت 1 لاکھ 22 ہزار 571.19 امریکی ڈالر کی بلند ترین سطح پر پہنچ گئی ہے۔

یہ کرپٹو مارکیٹ میں ایک سنگِ میل کی حیثیت رکھتا ہے، جس نے نہ صرف سرمایہ کاروں بلکہ مالیاتی ماہرین کی توجہ بھی اپنی جانب مبذول کرا لی ہے۔

برطانوی خبر رساں ایجنسی رائٹرزکے مطابق بٹ کوائن نے ایک نیا ریکارڈ قائم کرتے ہوئے 1 لاکھ 22 ہزار 571.19 ڈالر کی بلند ترین سطح کو چھوا ہے، جس کے بعد اس میں معمولی کمی ہوئی اور یہ آخری بار 2.4 فیصد اضافے کے ساتھ 1 لاکھ 21 ہزار 952.61 ڈالر پر ٹریڈ کر رہا تھا۔

رپورٹ کے مطابق امریکی ایوانِ نمائندگان میں کرپٹو کرنسی کی صنعت کے لیے ریگولیٹری فریم ورک سے متعلق کئی بلز پر بحث کی جائے گی، وہی فریم ورک جس کا مطالبہ صنعت طویل عرصے سے کر رہی ہے۔

خیال رہےکہ یہ مطالبات امریکی صدر ڈونلڈ ٹرمپ کے ساتھ ہم آہنگ ہیں، جنہوں نے خود کو ”کرپٹو صدر“ قرار دیا ہے اور پالیسی سازوں پر زور دیا ہے کہ وہ قواعد و ضوابط کو اس صنعت کے حق میں تبدیل کریں۔

واضح رہے کہ بٹ کوائن ایک ڈی سنٹرلائزڈ کرپٹو کرنسی نظام ہے جو بلاک چین ٹیکنالوجی پر مبنی ہے اور اسے نظام میں شامل کوئی بھی صارف مائن کر سکتا ہے، حالیہ برسوں میں بٹ کوائن کی مقبولیت میں زبردست اضافہ ہوا ہے تاہم مارکیٹ میں بٹ کوئن کی تعداد محدود ہے اور زیادہ تر بٹ کوئنز پہلے ہی "مائن” کئے جا چکے ہیں۔

بٹ کوائن کو 2009 میں متعارف کروایا گیا اور اس وقت اس کی قیمت 0.09 ڈالر تھی۔2011 میں اس کی قیمت 26.90 ڈالر تک پہنچ گئی اور 2014 کے آغاز میں اس کی قیمت 1238 ڈالر ریکارڈ کی گئی جس کے بعد اس کی قیمت میں تیزی سے کمی آئی اور 2014 کے اختتام تک یہ 315.21 ڈالر تک گر گئی۔