وفاقی کابینہ کا بڑا فیصلہ: ای او بی آئی کی پنشن میں 15 فیصد اضافے کی منظوری

اسلام آباد: وفاقی کابینہ نےایمپلائی اولڈ ایج بینیفٹس ادارے( ای او بی آئی) کی پنشن میں 15 فیصد اضافے کی منظوری دے دی جس کا اطلاق یکم جنوری 2025 سے ہو گا۔

تفصیلات کے مطابق وزیراعظم شہباز شریف کی زیر صدارت وفاقی کابینہ کا اجلاس ہوا جس میں کئی اہم فیصلے کئے گئے ہیں۔

دوران اجلاس وزیراعظم نے ای او بی آئی میں اصلاحات کے لیے کابینہ کمیٹی تشکیل دینے کی ہدایت کر دی جس میں غیر منظم شعبے کے ملازمین کو اولڈ ایج بینیفٹس دینے پر غور ہوگا،وفاقی کابینہ نے سی کیرج شپنگ ڈاکیومینٹس بل 2025 پر قانونی کارروائی کی منظوری دے دی۔

وفاقی کابینہ نے عوامی صحت کے شعبے کو ریلیف دینے کی غرض سے انسدادِ سرطان، امراضِ قلب اور دیگر زندگی بچانے والی ادویات پر پانچ سالہ استثنیٰ کی منظوری بھی دی۔

 اس فیصلے سے نہ صرف عوام کو مہنگی ادویات کی قیمتوں میں کمی کا براہِ راست فائدہ ملے گا بلکہ پاکستانی فارماسیوٹیکل صنعت کو بھی بین الاقوامی معیار کے تحت تحقیق اور پیداوار بڑھانے کا موقع ملے گا،جبکہ اس سے ان ادویات کی کھلے عام فروخت پر پابندی عائد ہو گی۔

دوسری جانب وفاقی کابینہ نے کابینہ کمیٹی برائے لیجسلیٹو کیسز کے فیصلوں کی توثیق کر دی۔