نیول کمانڈ اینڈ سٹاف کانفرنس ،پاک بحریہ کی ناقابل تسخیر سمندری دفاعی صلاحیتوں کو سراہاگیا

اسلام آباد: پاک فوج کے شعبہ تعلقات عامہ (آئی ایس پی آر)کے مطابق پاک بحریہ کی کمانڈ اینڈ سٹاف کانفرنس کا نیول ہیڈ کوارٹرز اسلام آباد میں انعقاد کیا گیا۔

آئی ایس پی آرکے مطابق چیف آف نیول اسٹاف ایڈمرل نوید اشرف نے کانفرنس کی صدارت کرتے ہوئے ”معرکۂ حق“ کے دوران پاک بحریہ کی ناقابلِ تسخیر دفاعی صلاحیتوں اور کارکردگی کو سراہا، اور اسے قومی سطح پر بحری دفاع کی ایک نمایاں جھلک قرار دیا۔

ترجمان پاک فوج کے مطابق دوران کانفرنس نیول چیف نے سمندری راستوں سے اشیائے ضروریہ کی ترسیل کے تسلسل کو یقینی بنانے کے لیے پاک بحریہ کے فعال اقدامات کو بھی سراہا۔

آئی ایس پی آر کی جانب سے مزید بتایا گیا کہ سربراہ پاک بحریہ ایڈمرل نوید اشرف نے میری ٹائم ڈومین میں ممکنہ روایتی اور غیر روایتی خطرات کا مقابلہ کرنے کے لیے جنگی تیاریوں کو برقرار رکھنے پر زور دیا۔

ایڈمرل نوید اشرف نے بغیر پائلٹ سسٹمز کی ترقی پر زور دیا، جن میں ڈرونز، بغیر عملے کے زیرِآب اور سطحی جہاز شامل ہیں، ان جدید نظاموں کی مدد سے نگرانی اور فوری ردعمل کی صلاحیتوں میں اضافہ ممکن ہو گا۔

آئی ایس پی آر کے مطابق کانفرنس میں نیول چیف کی سربراہی میں پرنسپل سٹاف آفسرز اور فیلڈ کمانڈرز نے پاک بحریہ کی پالیسیوں اور منصوبوں کا جائزہ لیا۔