بلوچستان میں دہشتگردوں سےمقابلے کے دوران شہید ہونیوالے میجر رب نواز کی نماز جنازہ ادا

مظفر آباد: بلوچستان میں فتنہ الہندوستان کے دہشتگردوں سے مقابلے کے دوران شہید ہونے والے میجر رب نواز کی نماز جنازہ ادا کردی گئی۔

 
تفصیلات کے مطابق میجر رب نواز شہید کی نماز جنازہ ان کے آبائی شہر مظفرآباد کے خورشید حسن خورشید گراؤنڈ میں ادا کی گئی، وزیراعظم آزادکشمیر نے میجر رب نواز شہید کے نماز جنازہ میں شرکت کی۔  

اس موقع پر وزیراعظم آزادکشمیر نے میجر رب نواز شہید کے اہل خانہ سے ملاقات کی اور اظہار تعزیت کیا،انہوں نے میجر رب نواز شہید  کو بھرپور انداز میں خراج عقیدت پیش کیا، کہا کہ میجر رب نواز شہید پر پوری قوم کو فخر ہے۔

وزیر اعظم آزاد کشمیر چوہدری انوار الحق نے مزید کہا کہ شہید کو وطن کے لیے جان قربان کرنے پر سلام  پیش کرتے ہیں، مسلح افواج پاکستان کی انسداد دہشتگردی کے لیے لازوال قربانیوں کو ہمیشہ یاد رکھا جائے گا ۔ 

میجر رب نواز شہید کے نماز جنازہ میں سپیکر آزادکشمیر قانون ساز اسمبلی چوہدری لطیف اکبر حکومتی وزرااور اعلیٰ سول و عسکری حکام بھی نماز جنازہ میں شریک ہوئے۔