انصاف کسی ایک فرد یا ادارے کی ذمہ داری نہیں بلکہ انسانیت کا اجتماعی فرض ہے، چیف جسٹس

اسلام آباد: چیف جسٹس پاکستان یحییٰ آفریدی نے کہا ہے کہ انصاف کسی ایک فرد یا ادارے کی ذمہ داری نہیں بلکہ یہ انصاف انسانیت کا اجتماعی فرض ہے۔

تفصیلات کے مطابق عالمی یوم انصاف پر اپنے پیغام میں چیف جسٹس یحییٰ آفریدی نے کہا کہ آج کے دن عدل، مساوات اور قانون کی حکمرانی کے عزم کی تجدید کرتے ہیں، انصاف کسی ایک فرد یا ادارے کی ذمہ داری نہیں، انصاف انسانیت کا اجتماعی فرض ہے، انصاف کی حد سرحدوں سے ماورا ہے جو امن اور انسانی حقوق کی بنیاد ہے۔

چیف جسٹس نے کہا کہ دنیا کے مسائل کا واحد حل قانون کی حکمرانی اور انصاف کی فراہمی ہے، دہشت گردی، انسانی اسمگلنگ، ماحولیاتی بحران جیسے مسائل کا حل عدالتی نظام ہے۔

انہوں نے مزید کہا کہ پاکستانی عدلیہ عالمی انصاف کی کوششوں کے ساتھ کھڑی ہے، عدالتی اصلاحات اور محروم طبقے کی آواز بننا ہماری اولین ترجیح ہے۔

دوسری جانب چیف جسٹس یحییٰ آفریدی نے سپریم کورٹ برانچ رجسٹری کوئٹہ کا دورہ کیا جہاں انہوں نے بار کونسلز کے نمائندہ وفد سے ملاقات میں وکلا کے مسائل و تجاویز پر گفتگو کی، جسٹس جمال مندوخیل، جسٹس مسرت ہلالی اور جسٹس شکیل احمد بھی موجود تھے۔

پاکستان سپریم کورٹ کی جانب سے جاری کر دہ اعلامیہ کے مطابق چیف جسٹس نے کوئٹہ اور مکران کی خواتین وکلا کے لیے فیڈرل جوڈیشل اکیڈمی اسلام آباد میں خصوصی تربیتی پروگرام اور وکلا کے دو بیجز کے لیے ٹریننگ کا اعلان کیا۔

اعلامیے میں مزید بتایا گیا کہ چیف جسٹس نے سپریم کورٹ برانچ رجسٹری میں بار روم کے لیے جگہ مختص کرنے، قانونی برادری اور سائلین کے لیے سہولت مرکز کے قیام کا فیصلہ بھی کیا۔

چیف جسٹس نے بار اور بینچ کو مؤثر انصاف کی فراہمی میں شراکت دار قرار دیتے ہوئے وکلا کے مسائل کے فوری حل کی یقین دہانی کرائی اور قانونی تعلیم و انصاف کی بہتری کے عزم کا اظہار کیا۔ چیف جسٹس نے کوئٹہ کو اپنا دوسرا گھر قرار دیا۔