موسمیاتی تبدیلی سے نمٹنےکے لیےتمام ادارے این ڈی ایم اے کے ساتھ ملکر مستقبل کیلئے پلان بنائیں،وزیراعظم

اسلام آباد: وزیر اعظم شہباز شریف نے کہا ہے کہ پاکستان موسمیاتی تبدیلی سے زیادہ متاثرہ ممالک میں شامل ہے،جس سے نمٹنے کے لیے تمام ادارے این ڈی ایم اے کے ساتھ ملکر مستقبل کے لیے پلان بنائیں۔

تفصیلات کے مطابق وزیراعظم شہباز شریف نے نیشنل ایمرجنسی آپریشن سینٹر کا دورہ کیا جہاں انہیں چیئرمین نیشنل ڈیزاسٹر مینجمنٹ اتھارٹی (این ڈی ایم اے) لیفٹیننٹ جنرل انعام حیدر ملک نے ملک بھر میں ہونے والی حالیہ بارشوں، سیلابی صورتحال اور امدادی سرگرمیوں کے حوالے سے تفصیلی بریفنگ دی۔ انہوں نے صوبائی حکومتوں کے ساتھ تعاون کے حوالے سے اقدامات کے بارے میں بھی بریف کیا۔

بریفنگ میں بتایا گیا کہ رواں موسم میں معمول سے 30 سے 40 فیصد زیادہ بارش ریکارڈ کی گئی ہے اور نکاسِ آب کے لیے آپریشن جاری ہے، تاہم اس عمل میں کچھ وقت لگے گا۔

این ڈی ایم اے کے دورے میں گفتگو کرتے ہوئے شہباز شریف نے کہا کہ ہمیں ابھی سے تیاری کرنا ہوگی اور مسائل کو حل کرنا ہوگا، این ڈی ایم اے کا چند ہفتے کے دوران یہ دوسرا دورہ ہے، ہر دورے میں بہترین بریفنگ دی جاتی ہے۔

 اپنے بیان میںوزیر اعظم شہباز شریف نے کہا کہ این ڈی ایم اے میں جدید ٹیکنالوجی کا استعمال کی جا رہی ہے، اسلام آباد، لاہور اور چکوال میں بہت بارش ہوئی۔

انہوں نے مزید کہا کہ پنجاب میں بہت زیادہ بارشیں ہوئیں ہیں اس دوران پنجاب حکومت اچھا کام کررہی ہے، وزیراعلیٰ پنجاب اور ان کی حکومت بارش سے نقصانات کا ازالہ کررہی ہے۔ 

انہوں نے کہا کہ تمام وزرائے اعلیٰ نے اس صورتحال کا بہتر مقابلہ کیا ہے، اور ابھی سے آئندہ کی صورتحال کی تیاری کرنی ہے، این ڈی ایم اے صوبائی حکومتوں کے ساتھ مل کر کام کرے۔

شہباز شریف نے کہا کہ این ڈی ایم اے کو مزید سازو سامان کی فراہمی کے لیے تیار ہوں، اور مل کر اگلے سال کی بھر پور تیاری کرنی چاہیے۔ پاکستان موسمیاتی تبدیلی سے زیادہ متاثرہ ممالک میں شامل ہے۔

انہوں نے کہا کہ جانی و مالی نقصان پر افسوس ہوا، تاہم آئندہ کے لیے وزیر منصوبہ بندی اور وزیر موسمیاتی تبدیلی مربوط پلان بنائیں۔ جبکہ بہترین طریقے سے آگاہی مہم چلائی جا رہی ہے اسے مزید بہتر بنائیں۔