جہلم : شدید بارشوں، دریاؤں میں طغیانی سے سیلابی صورتحال، پولیس کا کامیاب ریسکیو آپریشن

جہلم: شدید بارشوں، دریاؤں میں طغیانی سے جہلم میں سیلابی صورتحال، جہلم پولیس کی شاندار کارکردگی کا مظاہرہ دکھاتے ہوئے شہریوں کے جان و مال کا تحفظ کیا۔

ترجمان پنجاب پولیس کے مطابق ڈسٹرکٹ پولیس آفیسر(ڈی پی او) طارق عزیز کی قیادت میں جہلم پولیس نے اب تک سیلاب میں پھنسے 400 سے زائد شہریوں کو ریسکیو کیا،اوارپولیس اہلکار اپنی جانوں کی پرواہ کئے بغیر سیلاب متاثرین کو ریسکیو کر رہی ہے۔

ترجمان کا مزید کہنا ہے کہ جہلم پولیس کا ایک جوان حیدر سیلاب میں پھنسے شہریوں کی مدد کے دوران خود بھی سیلابی ریلے کی نذر ہو گیاجس کی تلاش بھی جاری ہے۔

دوسری جانب آئی جی پنجاب ڈاکٹرعثمان انور نے شہریوں کی قیمتی جانیں بچانے پرجہلم پولیس کو شاباش دیتے ہوئے کہا کہ ڈی پی او طارق عزیز اور انکی ٹیم مسلسل سیلاب زدہ علاقوں میں امدادی سرگرمیوں میں حصہ لے رہی ہے۔

انہوں نے مزید کہا کہ پنجاب پولیس سیلاب زدہ علاقوں میں متعلقہ اداروں کے ہمراہ ریسکیو آپریشنز میں بھرپور حصہ لے رہی ہے۔