زمان پارک حملہ کیس: بانی پی ٹی آئی کے ناقابلِ ضمانت وارنٹ گرفتاری جاری

لاہور: کینٹ کچہری لاہور نے زمان پارک میں بانی پی ٹی آئی  کی رہائش گاہ کے باہر اسلام آباد پولیس پر مبینہ حملے کے کیس میں عمران خان اور سینیٹر شبلی فراز کے ناقابلِ ضمانت وارنٹ گرفتاری جاری کر دیے۔

عدالت نے اڈیالہ جیل حکام کو روبکار کے ذریعے عمران خان کو طلبی کا سمن بھی ارسال کر دیا، جب کہ کیس کی مزید سماعت 30 جولائی تک ملتوی کر دی گئی ہے۔

یہ مقدمہ تھانہ ریس کورس پولیس کی جانب سے اس وقت درج کیا گیا تھا جب 5 مارچ 2023 کو اسلام آباد پولیس عمران خان کو توشہ خانہ کیس میں گرفتار کرنے کے لیے زمان پارک پہنچی تھی، جہاں پی ٹی آئی کارکنوں کی بڑی تعداد نے مزاحمت کی تھی۔

عدالتی حکم کے مطابق دونوں رہنماؤں کو آئندہ سماعت پر ہر صورت پیش کیا جائے گا۔