پاک بھارت تجارتی کشیدگی: افغان برآمدات کے لیے واہگہ بارڈر بند

پاکستان اور بھارت کے درمیان حالیہ کشیدگی کے باعث پاکستان نے افغانستان کو واہگہ کے راستے بھارت کو برآمدات کی اجازت دینے سے انکار کر دیاہے،جس پر افغان حکام نے شدید تخفظات کا اظہار کیا ہے۔ 

مزید یہ کہ حکومتی ذرائع کے مطابق افغان نائب وزیر صنعت و تجارت کی سربراہی میں ایک اعلی سطحی وفد نے 21سے23 جولائی کے دوران اسلام آباد کا دورہ کیا، جہاں انہوں نے پاکستان کے سیکریٹری تجارت سے ملاقات میں اس معاملے کو اجاگر کیا ۔ 

افغان وفد نے نشاندہی کی کہ 2010 کے افغانستان -پاکستان ٹرانزٹ ٹریڈ معاہدے (APTTA) کے تحت افغانستان کو بھارت کو واہگہ کے راستے برآمدات کی اجازت گاصل تھی،مگر مئی 2025 سے یہ اجازت معطل کر دی گئی ہے۔ 

پاکستانی حکام نے افغان وفد کو آگاہ کیا کہ یہ اقدام بھارت کے ساتھ حالیہ سفارتی و تجارتی تنازع کے تناظر میں اختیار کیا گیا ہے۔ پاکستان نے نئی پالیسے کے تحت بھارت کے ساتھ کسی بھی تیسرے ملک کی تجارت پر مکمل پابندی عائد کر دی ہے،جس کا اطلاق زمینی، فضائی اور سمندری تمام راستوں پر کیا گیا ہے۔ 

یاد رہے کہ بھارت کی جانب سے 22 اپریل کو مقبوضہ کشمیر کے علاقے پہلگام میں سیاحوں پر حملے کا الزام پاکستان پر عائد کرنے اور سندھ طاس معاہدہ یک طرفہ طور پر معطل کرنے کے بعد پاکستان نے سخت رد عمل دیتے ہوئے مئی میں بھارت کے ساتھ تمام تر تجادتی سرگرمیاں معطل کر دی تھیں۔ 

قومی سلامتی کمیٹی کے فیصلے کے مطابق واہگہ بارڈر بند کر دیا گیا ، بھارتی شہریوں کو 48 گھنٹوں مپاکستان چھوڑنے کی ہدایت جاری کر دی گئی۔ 

افغانستان کی جانب سے پاکستان کی اس پالیسی پر شدید تشویش کا اظہار کیا جا رہا ہے، کیونکہ اس سے افغان برآمدات کو بڑا دھچکا پہنچا ہے، بالخصوص بھارت کی منڈیوں تک رسائی محدود ہو گئی ہے۔ دونوں ممالک کے درمیان اس معاملے پر مستقبل میں مزید مذاکرات کا امکان ہے۔