فلم ’’سردار جی تھری ‘‘پابندی ، بھارتی پنجاب کے وزیراعلیٰ بھگونت مان کا ردعمل سامنے آگیا

 ویب ڈیسک: بھارتی پنجاب کے وزیراعلیٰ بھگونت مان پاکستانی اداکارہ ہانیہ عامر کے ساتھ دلجیت دوسانجھ کی فلم ’سردار جی 3‘  کی حمایت میں سامنے آگئے ۔

انہوں نے سکھوں کے ساتھ بھارتی حکومت کے رویے کو زبردست تنقید کا نشانہ بنایا ہے۔

اسمبلی میں تقریر کے دوران انہوں نے دلجیت  کے ساتھ یکجہتی کا اظہارکرتے ہوئے کہا کہ دلجیت کی فلم کی شوٹنگ پہلگام واقعے سے پہلے ہوچکی تھی ۔پاکستان اور بھارت کے تعلقات میں کشیدگی اس کے بعد ہوئی ، ایسے میں فلم پر اس وجہ سے پابندی لگانا کہ اس میں پاکستانی ادکارہ بھی شامل ہیں ، بے بنیاد ہے۔

ان کا مزید کہنا تھا کہ پنجابیوں کا کلچر، زبان اور روایات چاہے وہ سرحد کے اس طرف ہوں یا اُس طرف، ایک جیسا ہے۔ وہ بھی پنجابی بولتے ہیں ہم بھی پنجابی بولتے ہیںلیکن آپ کہتے ہیں کہ دلجیت دوسانجھ کی فلم یہاں ریلیز نہیں ہو سکتی۔

انہوں نے ریاستی اسمبلی میں بھارتیہ جنتا پارٹی (بی جے پی) کو آڑے ہاتھوں لیتے ہوئے کہا کہ کبھی آپ انہیں ’غدار‘ کہتے ہیں، کبھی ’سردار‘ اور ساتھ ہی وزیر اعظم نریندر مودی کے 2015 کے پاکستان دورے پر سوال اٹھاتے ہوئے کہا کہ بھارتی وزیراعظم پاکستان جا سکتے ہیں لیکن ہم نہیں؟

بھگونت مان نے  کہاکہ پنجاب کے باشندوں کو بھیڑ بکریاں سمجھ رکھا ہےکبھی کہا جاتا ہے کہ اب پاکستان سے لڑوپھر کہا جاتا ہے کہ اب پاکستان کے ساتھ ٹھیک ہو جاؤ۔ وہ پورے بھارت کو بتانا چاہتے ہیں، کہ پنجاب اور ہریانہ کے بغیر آپ روٹی نہیں کھا سکتے۔ ملک کی 70 فیصد غذا پنجاب میں ہی پیدا ہوتی ہے۔

 واضح رہے کہ بھارتی اداکار دلجیت دوسانجھ اور پاکستانی اداکارہ ہانیہ عامر کی فلم سردار جی 3 پر بھارت میں پابندی عائد ہے جبکہ دنیا بھر میں یہ فلم ریلیز کردی گئی ہے۔

پہلگام واقعے کے بعد بھارتی حکام نے متعدد پاکستانی فنکاروں کے سوشل میڈیا اکاؤنٹس پر بھی پابندی لگادی تھی۔