راولپنڈی میں غیرت کے نام پر قتل، خاتون کی قبر کشائی اور پوسٹ مارٹم رپورٹ میں اہم انکشافات 

راولپنڈی: راولپنڈی میںجرگے کے حکم پر غیر ت کے نام پر قتل ہونے والی خاتون کی قبر کشائی کے بعد پوسٹ مارٹم کا عمل مکمل کرلیا گیا ہے،جبکہ قبرکشائی اور لاش کے پوسٹ مارٹم کا عمل علاقہ مجسٹریٹ قمر عباس تارڑ کی نگرانی میں مکمل کیا گیا۔

پولیس نے گورکن راشد اور قبرستان کمیٹی کے سیکرٹری سیف الرحمن کی نشاندہی پر مقتولہ کی قبر کشائی کی گئی،بعدا زاں فارنزک ٹیم نے مقتولہ کی لاش کے نمونے بھی حاصل کرلیے۔

قبر کشائی کے موقع پر اسپتال کی میڈیکل ٹیم کی سربراہی ڈاکٹرمصباح نے کی، اس موقع پر پنجاب فارنزک لیبارٹری کی ٹیم بھی موجود تھی۔

پولیس کے مطابق مقتولہ کے سیمپل فارنزک ٹیسٹ کے لیے بھیجے جائیں گے جس کی رپورٹ سے یہ معلوم ہوگا کہ مقتولہ کا قتل کیسے کیا گیا۔

جبکہ پوسٹ مارٹم رپورٹ میں لڑکی کو گلا دبا کر قتل کرنے کی تصدیق ہوگئی ہے، مقتولہ کے سر اور چہرے پر تشدد کے نشانات موجود تھے۔
ذرائع نے بتایا کہ پوسٹ مارٹم کیلئے میت نکالنے پر مقتولہ کا چہرہ نیلا تھا۔

خیال رہے کہ خاتون کے قتل کا حکم جرگے کے سربراہ عصمت اللہ نے دیا تھا جسے پولیس کی جانب سے گرفتار کرلیا گیا ہے۔

پولیس کے مطابق جرگے کے سربراہ عصمت اللہ نے مقتولہ کا جنازہ بھی خود ہی پڑھایا اور خاتون کے دوسرے شوہر عثمان نے بھی خود کو پولیس کے حوالے کردیا۔ 

 پولیس کی جانب سے مزید بتایا گیا کہ خاتون اور عثمان کا نکاح 12 جولائی کو مظفر آباد میں ہوا ،جس دوران مقتولہ نے جوڈیشل مجسٹریٹ کے سامنے پیش ہو کر مرضی سے نکاح کا بیان بھی دیا تھا جب کہ مقتولہ نے یہ بھی بتایا تھا کہ پہلا شوہر اسے زبانی طلاق دے چکا ہے۔

پولیس کا کہنا تھا کہ ملزم عثمان کے والد نے بتایا کہ نکاح کے 4 دن بعد مسلح افراد نے دھمکیاں دیں پھر کہاکہ نکاح ہو گیا ہے تو لڑکی واپس کر دو،اسے باضابطہ رخصت کریں گے، وہ لوگ لڑکی کو لے گئے ، پھربعد میں پتا چلا کہ اسے قتل کر دیا گیا ہے۔