تھائی لینڈ اورکمبوڈیا میں فوری اور غیر مشروط جنگ بندی پر اتفاق

کوالالمپور : کمبوڈیا اور تھائی لینڈ میں فوری اور غیر مشروط جنگ بندی پر اتفاق ہو گیا ہے۔

غیر ملکی میڈیاکے مطابق جنگ بندی کا یہ معاہدہ ملائیشیا کے دارالحکومت کوالالمپور میں ہونے والے اعلیٰ سطحی مذاکرات میں طے پایا۔

 مذاکرات میں تھائی لینڈ کے قائم مقام وزیراعظم، کمبوڈیا کے وزیراعظم اور ملائیشین وزیراعظم انور ابراہیم نے شرکت کی،جبکہ اس موقع پر امریکہ اور چین کے سفیر بھی موجود تھے۔

اس موقع پر تھائی لینڈ کے وزیراعظم نے کہا کہ جنگ بندی نیک نیتی سے طے پائی ہے،تھائی لینڈ امن کے لیے پُرعزم ہے۔

دوسری جانب کمبوڈین وزیراعظم نے کہا کہ تھائی لینڈ کے ساتھ مذاکرات اچھے رہے، ان کا کہنا تھا کہ تنازعہ کے باعث 3لاکھ افراد بے گھر ہو چکے ہیں۔

کمبوڈین وزیراعظم کا کہنا تھا کہ ثالثی پر ملائیشین وزیراعظم، امریکی صدر اور چین کے مشکورہیں،قیام امن کیلئے فریقین نے مثبت کرداراداکیا۔

خیال رہے کہ تھائی لینڈ اور کمبوڈیا کے درمیان حالیہ سرحدی جھڑپوں میں اب تک 35 افراد ہلاک اور 3 لاکھ سے زائد افراد بے گھر ہو چکے ہیں۔