سینئر وکیل خواجہ شمس الاسلام کو قتل کرنے والے ملزم کی شناخت سامنے آگئی

سینئر وکیل خواجہ شمس الاسلام کے قتل کیس میں اہم پیش رفت ہوئی ہے، واقعے میں ملوث ملزم کی شناخت عمران خان آفریدی کے نام سے کر لی گئی ہے، جو مقتول وکیل کا سابق گن مین تھا۔

پولیس کے مطابق، گلشن سکندرآباد میں کارروائی کے دوران ملزم عمران آفریدی کے دو رشتہ داروں کو حراست میں لیا گیا ہے، جن سے تفتیش جاری ہے تاکہ مفرور ملزم کا سراغ لگایا جا سکے۔

حکام کا کہنا ہے کہ عمران آفریدی واقعے کے بعد سے فرار ہے، اور اس کی گرفتاری کے لیے مختلف مقامات پر چھاپے مارے جا رہے ہیں۔

دوسری جانب کراچی بار ایسوسی ایشن نے واقعے پر شدید ردعمل ظاہر کرتے ہوئے قاتلوں کی فوری گرفتاری کا مطالبہ کیا ہے۔

یاد رہے کہ سینئر وکیل خواجہ شمس الاسلام پر ڈی ایچ اے فیز 6 میں اس وقت حملہ کیا گیا تھا جب وہ ایک جنازے میں شرکت کے لیے اپنے بیٹے کے ہمراہ موجود تھے۔ حملہ آور قمیض شلوار میں ملبوس اور ماسک پہنے ہوئے تھا، جو موٹر سائیکل پر موقع سے فرار ہو گیا۔

فائرنگ کے نتیجے میں خواجہ شمس الاسلام کے پیٹ جبکہ ان کے بیٹے کے کمر میں گولی لگی۔ دونوں کو فوری طور پر قریبی نجی اسپتال منتقل کیا گیا، تاہم سینئر وکیل زخموں کی تاب نہ لاتے ہوئے دم توڑ گئے۔

واقعے کی سی سی ٹی وی فوٹیج بھی منظر عام پر آ چکی ہے، جس میں حملہ آور کو فائرنگ کرتے دیکھا جا سکتا ہے۔